260-шы Қара пайым-сөз: Қазақ халқының тарихи шежіресін неге нөмірлемегенім туралы айтайын

Қазақ шежіресі туралы осы күнге дейін 281 кітап шығыпты, ұйымшылдықтары мен қаражаттары жоқ болғандықтан, әлі шықпағандары қанша: https://kk.wikipedia.org/wiki/Қазақ_шежірелерінің_тізімі

Мысалы, өзім жазған «Маңғытай-Дандай: Бөрібай шежіресі» бұл әдебиеттердің арасында жоқ. Жалпы құлақтарыңыз әлі дұрыс қабылдай алмай жатқан «Қазақтың тоғыз танымының – екінші танымы» деп қазіргі уақытта белгілі болып отырған «Қазақ халқының тарихи шежіресін» жариялап отырған себебім, біздер ең әуелі «қазақ» деген ұлттың ақ-қарасын толық дұрыс ажыратып алуымыз керек. Айтып ауыз жиғанша болған жоқ, Sabitkhan Sarsenbaev деген оқырманым: «Ұлы жүз емес – Үлкен жүз. Әскери Одақ. 1. Оң қанат (Үлкен жүз – Түмен); 2. Орта қанат (Орта жүз – Түмен); 3. Сол қанат (Кіші жүз – Түмен, Түмен – он мың әскер). Ұлы болу үшін – арабтар сияқты дін ойлап табу керек. Ш.Уалихановтың очеректерінде және шет ел жазбаларында «Үлкен жүз» деп жазылған. «Қыз Жібек» фильмі түсірілгенде алғаш рет – «Ұлы Жүз» деген сөз қолданылды. Қазақ арасында – жік салу осы фильмнен басталды» деп пікір білдіріпті. Бұдан басқа: «Сіргелі тайпасы: 1. Байұлы: 5) Қарабатыр, 6) Шалдар, 7) Жайдақ, 8) Байжігіт» деген шежіре жолына байланысты курстасым Нурсауле Алтекова: «Менің естуімше «Шалдар-Байжігіт бір ата». Баспагер Жарылқасын Даулет ағамыз осылай айтқан» деп пікір жазыпты. Оу, оқырмандарым, қымсынбаңыздар, ұялмаңыздар, пікірлеріңізді жазыңыздар. Мен Сіздердің пікірлеріңіздің бір де біреуін қалдырмастан, алдағы уақытта «Қазақ халқының тарихи шежіресіне түсініктеме» деп бөлек жариялаймын. Ғылыми зерттеу деп негізінде осыны айтады. «Қазақтың тоғыз танымының – екінші танымы» деп анықтаған «Қазақ халқының тарихи шежіресін» нөмірлемеу себебім де осы. Сіздердің арқаларыңызда өз парақшамда «Қазақ шежіресінің» бас-аяғын дұрыстап жинап-жиыстырып, тек содан кейін ғана біржолата нөмірлеген дұрыс болады деп отырмын.