220-шы Қара пайым-сөз: Екінші бөлім: Ілім-білім жарыстырып, аузыма құм құям деп әуре болмаңыздар

Күліпхан мырза, өзіңіз жауабын тосқан «Мұса пайғамбардың аса таяғына» келер болсақ, Сіз өзіңіз қолдан жасаған аса таяғыңызға орыс тілі түгілі, әлемдегі 6 мың тілдің ішіндегі ең сирек айтылатын 10 тілде (Токи-Пона, Рачасап, На'ви, Линкос, Сильбо, Туюка, Анал, Арчи, Койсан, Аяпан) «бүркіт пен жылан» туралы өлең жолдарын сыйдырып жазсаңыз да, ол аса таяғыңызың қасиеті бәрібір Мұса ғ.с.-ның аса таяғының маңына да жақындай алмасы анық еді. Себебі, Мұса ғ.с-ның аса таяғына ғаламат қасиет қондырған Құдайдың құдіреті мен шексіз ілім-білімі болатын. Сіздің әңгімеңіздегі дүмше молданың негізсіз жауабына ренжіп, соған бола ислам дінін тәрк етсеңіз, өзіңіз де сол дүмше молданың әргі-бергі жағындағы адам болғаныңыз. Сіз де, біз де, миллион рет тыраштансақ та, Алланың білген ілімінің миллиардтан бір бөлігіне де жете алмаймыз. Сіз бен Сіз сияқтылардың өзінше «ілім-білім-ғылым» деп көрінген жерге ретті-ретсіз тықпалап жүргендеріңіз, түбінде өз бастарыңызға арылмас сор мен бақытсыздық әкелетін қасіретті жалған ілім. Мен оны Сіздерге тезірек «таста» дегенмен, оны Сіздер бәрібір тастамайсыздар. Азабын өздеріңіз татыңыздар.

Берік мырза, Сізге келетін болсақ, Григориандық Күн күнтізбесі бойынша бір жылда 365 (28 ақпан) және 366 күн (29 ақпан – орташа 365,2425 тәулік), Һижралық Ай күнтізбесінде бір жылда 354-355 күн (орташа 354,36706 тәулік) бар. Екі күнтізбе арасындағы тәулік айырмашылығы қалыптасқан табиғи-астрономиялық жағдайға орай 10-11-12 күн аралығында болады. Жеті күндік аптамен есептеу күллі әлем үшін ортақ, ол христиандық, буддалық, мұсылмандық т.т. апта болып бөлінбейді. Қазақтың «жұма» деген сөзі «Йаум әл-Жумъа» деген қасиетті Құран сөзінен алынған («әл-Жумъа» деп аталатын сүре бар). «Қасиетті жұма деп, сәрсенбіні айтып жүр» деп шатасып отырған ел-жұрт емес, өзіңіз Берік мырза. Григориандық Күн күнтізбесі бойынша жуық түрде 32 жыл өткенде, Һижралық Ай күнтізбесі бойынша 33 жыл өтеді. Мысалы: 365,2425 күн × 32 жыл = 11 688 күн ÷ 33 жыл = 354,18182 күн. Осы есепті өз есебіңізбен салыстырып, қателеріңізді тексеріңіз...

Күліпхан және Берік мырзалар, тағы да ескертіп айтамын, жанталасып ел-жұртты тура жолдан тайдыруға тырысқан әрекеттеріңіз тек өз бастарыңызға бақытсыздық әкеледі. Әлі де кеш болмай тұрғанда, кәлима айтып, тәубеге келіп, ата-бабаларымыз Тәңірге, пұтқа табынуды тастап, артықшылығын көрген соң, ақылмен және санасымен қабылдаған ислам дініне қайта кіріңіздер...