Хөкүмәт Премьер-министры Рөстәм Мәрданов Гаилә сәясәте буенча координацион совет утырышы үткәрде.
– Агымдагы елның гыйнвар-апрель айларында республикада 15 267 бала туган. Узган ел белән чагыштырганда, бу 616га кимрәк. Атап әйткәндә, бүген бездә бала тудыру яшендәге һәр хатын-кызга 1,696 бала туры килә. 2016 ел белән чагыштырганда, 8,8гә кимрәк. Яшьләр гаилә корырга, балалар тудырырга ашыкмый. Без янә демография кризисына аяк басабыз, – диде ул.
Русия Президентының май указларына ярашлы 2024 елга туым 1,7 коэффициентына күтәрелергә тиеш. Бу мәсьәләне хәл итү өчен беренче бала гына түгел, аннан соңгыларын тудыруны арттырырга кирәк. Моның өчен яңа юнәлешләр буенча эш җәелдерү мотлак.
– Бу мәсьәләне хәл итү өчен 18 яшькә кадәр булган 3 балалы гаиләләр саны 50 проценттан да ким булмаска тиеш. Ә бездә бу күрсәткеч бары тик 5,5 процент, – диде Башкортстан Республикасы Башлыгы каршындагы дәүләт хезмәте һәм идарә академиясе доценты Яна Скрябина.
“Башкортостанстат” үткәргән тикшеренүләрдән күренүенчә, беренче бала туу гаиләләрнең матди хәлен какшата. Шушы сәбәп буенча күпләр икенче һәм аннан соңгы балаларга гомер бирергә ашыкмый. Моннан тыш, гаиләләрнең торак мәсьәләсе хәл ителмәве, киләчәккә ышаныч булмавы да туымны киметә. Ә биш һәм аннан да күбрәк бала тудыру өчен, атап кителгән пргоблемалардан тыш, ата-аналарның сәламәтлегенең нык булмавы да кушыла.
– Демография мәсьәләсен тиз арада хәл итеп булмый. Әмма безгә ничек тә дөрес юл табарга кирәк. Юкса, якын киләчәктә Русиядә һәм республикада халык саны бик күпкә кыскарачак, – диде Яна Скрябина.
Утырышта беренче бала туган очракта түләнелүче 300 мең сум ярдәмне алу өчен яшь чикләрен билгеләү тәкъдиме дә яңгырады, чөнки бүгенге яшьләр бала тудырырга ашыкмый. Шул ук вакытта яшьләрнең соңлап никахлашуы да игътибар таләп итә.
Гөлия Гәрәева.