Уфа “Нур” татар дәүләт театрында “Ихлас сүз” бәйгесендә җиңүчеләрне тәбрикләү тантанасы узды. Республикада игълан ителгән Гаилә елына багышланган бәйгене Гаилә, хезмәт һәм халыкны социаль яклау министрлыгы ярдәме белән “Гаилә кыйммәтләре – изгелек, мәхәббәт һәм акыл чыганагы” дип аталган программа кысаларында Башкортстан татарлары милли-мәдәни автономиясе оештырды.
Республика Башлыгы Хакимияте иҗтимагый-сәяси үсеш идарәсенең милли сәясәтне гамәлгә ашыру советнигы Гөлчәчәк Мөхәммәтҗәнова, Дәүләт җыелышы-Корылтай депутаты, Башкортстан татарлары милли-мәдәни автономиясе рәисе Римма Үтәшева, Башкортстанда Бала хокуклары буенча вәкил Милана Скоробогатова, Халыклар услыгы йорты директоры Азат Ибрагимов һәм башкалар бәйрәмнең абруйлы кунаклары булды.
Жюри “Кызыл таң”, “Өмет” гәзитләрендә, “Тулпар”, “Әллүки” журналларынд гаилә кыйммәтләрен саклау, аталар һәм аналар мәсьәләләре, бәхетле балачак темаларына багышлап язылган илледән артык мәкәләне тикшерде. Җиңүчеләр дип 15 журналист табылды. Рәдиф Фаткуллин, Миляүшә Латыйпова, Зөһрә Исламова, Венера Мәҗитова, Гөлия Гәрәева, Лира Гәрәева, Гөлнара Гыйлемханова язмалары “Бер гаилә тарихы” номинациясендә иң яхшылары дип табылды. “Буыннар бәйләнеше – вакыт бәйләнеше” номинациясендә – Фәрит Фаткуллин белән Галимә Вәлиуллина, “Бәхетле балачак” номинациясендә – Зөлфия Фәтхетдинова, Юлия Төхбәтуллина, “Гаилә һәм җәмгыять” номинациясендә – Руфина Таҗиева, “Гаилә: проблема һәм перпспектива” номинациясендә – Зәйфә Салихова, Резеда фәттахова, Язгөл Сафина җиңү яулады. Җиңүчеләргә дипломнар һәм сертификатлар тапшырылды.
Бәйрәмне популяр артистлар Эльмир Газизуллин белән Гөлназ Биктимерова алып барды. Башкортстанның халык артисты Рәсимә Гайфуллина, Альберт Шәйхетдинов Н. Асанбаев пьесасы буенча куелган “Су юлы” спектакленнән өзек күрсәтте.
Башкортстан татарлары милли-мәдәни автономиясе шулай ук ел башыннан Борай, Дүртөйле, Бәләбәй районнарында “Гаилә учагы” бәйгеләре оештырган иде. Бу кичне аларда җиңү яулаган гаиләләр чыгышы да ямь өстенә ямь булды. Шулай ук Уфа сәнгать училищесы студентлары, яшь җырчылар Кадрия Исламова белән Азат Кадыйровның чыгышлары да килгән кунакларның күңеленә хуш килде.
Гаилә – җылы учак ул. Учагында утыны янамы, димәк, ул гаилә тату, дус, бердәм. Һәммәбезнең гаиләләсе шифалы ял бирсен. Әби-бабай, әти-әни киләчәк буынга – сабыйларга үрнәк, ә без өлкәннәргә ихтирамлы мөнәсәбәттә булыйк.
Зөһрә Галиева.
Динар Кәлимуллин фотосы.