Уфа “Нур” татар дәүләт театры чираттагы иҗат сезонын япты.
Чираттагы иҗат сезонын ябу тантанасында еллык эшчәнлеккә нәтиҗәләр ясалды. Театрның директоры Илдар Хаҗиев билгеләп үтүенчә, тәмамланган 26нчы сезон күркәм чараларга бай булды.
“Гаилә елы” кысаларында театрда гамәлгә ашырылган проектларның берсе – “BabyNur”. “Нур” театрының Зур залы фойесында балалар өчен төрле конкурслар, флешмоблар, уеннар, остаханәләр оештырылды. Кемнәрдер рәсем төшерү серләренә төшенде, икенчеләр кул астындагы гади генә әйберләрдән төрле сыннар, җиһазлар ясарга өйрәнде. Шунда ук балаларның кул эшләреннән күргәзмә дә урын алды. Мондый бәйрәмнәрнең һәрберсенең ахырында театр яшь тамашачыларга әкиятләр бүләк итте. Бу проектның төп максаты – Уфада яшәүче татар гаиләләрендә милли мохитне, халкыбызның гореф-гадәтләрен саклау, ата-ана һәм балалар арасында бәйлә-нешләрне ныгыту.
“Нур” театры каршында балалар студияләре эшләү дә мөһим. Театр студиясе, сәнгать неч-кәлекләрен ачып, актерлык осталыгы, сөйләм техникасы, вокал дәресләре бирсә, художество-декорация студиясендә балалар тамашалар өчен декорация һәм эскизлар булдырырга өйрәнде.
Узган сезонның тагын бер әһәмиятле вакыйгасы – театрда иҗат лабораториясе эшли башлау. Бу чара, нинди дә булса драматургның әсәрен сайлап алып, “Нур” артистлары тарафыннан театр тәнкыйтьчеләре алдында рольләргә бүлеп укуга корылган. Проектның мәгънәсе – яшь драматургларның әсәрләрен күзаллау, аларга үсеш бирү hәм, әлбәттә, театр репертуарын баетырлык материал эзләү.
26нчы сезон “Нур” тамашачыларына чагу премьералар бүләк итте. Алар – Роланд Шиммельпфеннигның “Үткәннән килгән ханым”, Гафур Каюмовның “Упкын өстендә уен” драмалары, Зөлфәт Хәкимнең “Тыкрыкта булды бу хәл” комедиясе, Мөнир Кунафинның “Кояшлы якка чык” лирик анекдоты, “Җыр-МәзәкFM.НУР” театраль тамашасы. Әлеге тамашаларны театрның режиссерлары, Башкортстанның һәм Татарстанның атказанган сәнгать эшлеклесе Байрас Ибраһимов һәм Башкортстанның атказанган артисты Илдар Вәлиев сәхнәгә куйды. Озак еллар дәвамында театр репертуарында лаеклы урын алган спектакльләр дә кабат уңышлы сәхнәләштерелде.
Шунысын да әйтергә кирәк: “Нур” театры быел беренче тапкыр тамашачыларның актерлар белән онлайн-очрашуын оештырды. Һәр теләүченең, Интернет аша чын вакыт режимында актерларга һәм режиссерга үзен кызыксындырган сорауларын биреп, җавап алу, фикер һәм теләкләрен җиткерү мөмкинлеге булды.
Сезон дәвамында театр гастроль һәм фестивальләрдә дә шактый активлык күрсәтте. “Нур” театрының гастроль географиясе тагын да киңәйде. Аның быелгы ачышы – Пермь һәм Барда яклары. “Нур” театры сәхнәсендә күп кенә башка шәһәр һәм төбәкләрдән килгән театрларның чыгыш ясавы да игътибарга лаек. Май аенда “Нур” театры Татарстан Республикасында узган “Буа: диалог киңлеге” халыкара театр фестивалендә катнашты. Немец дра-матургының Буа театрында сәхнәләштерелгән “Үткәннән килгән ханым” пьесасы бер тамашачыны да битараф калдырмады. Күренекле театр тәнкыйтьчеләре дә әлеге спектакльгә югары бәя бирде. Алар билгеләвенчә, мондый дәрәҗәдәге әсәр белән эшләү театрның заман белән бергә атлавын күрсәтә.
“Нур” театрының иҗат сезоны ябылу тантанасында, матур традицияне дәвам итеп, актерларны төрле номинацияләрдә бүләкләделәр. “Иң яхшы хатын-кыз роле” номинациясендә “Үткәннән килгән ханым” спектаклендә Клаудиа ролен башкаручы Айсылу Гомәрова җиңде. “Иң яхшы ир-егет роле” номинациясендә “Упкын өстендә уен” драмасында Ногман ролен уйнаган Эльмир Хәертдинов җиңүче дип табылды. Шул ук номинациядә “Кояшлы якка чык” спектаклендә Федя роле өчен Риф Гобәйдуллин да билгеләнде. “Ел актрисасы” номинациясендә беренчелекне Ирина Ганиева яулады. Бүләкне ул “Үткәннән килгән ханым” драмасындагы Роми роле өчен алды. “Тамашачы сөюе” номинациясенә “Тыкрыкта булды бу хәл” комедиясендә – Ракыйга, “Упкын өстендә уен” драмасында Гайшә рольләрен башкарган Рида Фәхрисламова лаек булды.
Театраль сезонны “Нур” Таҗи Гыйззәт һәм Җәүдәт Фәйзинең “Башмагым” комедиясе белән тәмамлады. Милли театр сәнгатенең легендасына әверелгән бу музыкаль водевиль – бүген төрле буын тамашачыларының гына түгел, артистларның да иң яраткан спектакле.
Шунысы сөенечле: “Нур” театрының аудиториясе елдан-ел киңәя. Тамашачылар арасында яшь буын вәкилләре артуы күзәтелә. “Нур”ның баш режиссеры Байрас Ибраһимов билгеләвенчә, театрның төп бурычы – телне, гореф-гадәтләрне, милли традицияләрне саклау һәм яшь буынга тапшыру.
Сезон ябылуга карамастан, театр үз эшен туктатмый. Эшлекле очрашулар уза, яңа проектлар өстендә эш алып барыла, яңа премьераларга әзерлек бара. Инде берничә айдан “Нур” театры ишекләре тамашачылар өчен ачылачак.
Гөлназ Хизбуллина,
“Нур” театрының реклама-мәгълүмат бүлеге белгече.