Сибайдә үткән “Урал аръягы – 2018” икътисади форум малтабарлыкны үстерү өчен уңайлы инвестиция шартлары тудыруга багышланды.
Төбәкне социаль-икътисади үстерү юнәлешендә мөһим әһәмияткә ия чарада республика Башлыгы Рөстәм Хәмитов, Ырынбур өлкәсе губернаторы Юрий Берг, федераль һәм республика власте вәкилләре, Дәүләт думасы, Дәүләт җыелышы-Корылтай депутатлары, эре һәм кече бизнес предприятиеләре җитәкчеләре катнашты. Форумда берничә инвестиция килешүенә кул куелды. Пленар утырышта Рөстәм Хәмитов чыгыш ясады.
Башкортстан – Русиянең тотрыклы икътисадлы һәм бюджетлы, ныклы, уңышлы субъекты. Соңгы елларда республикадагы бик күп төп күрсәткечләр илдәге уртача саннардан югарырак, без инвестиция җәлеп итү хәвеф минималь булган төбәкләр төркеменә карыйбыз. Барлык социаль бурычлар да тулы күләмдә үтәлә.
Ел саен тулай төбәк продукты, сәнәгать, авыл хуҗалыгы җитештерүе арта бара. 2010 ел белән чагыштырганда, тулай төбәк продукты – 20 процентка, сәнәгать һәм инвестицияләр – өчтән бергә, аграр тармак – 1,5 тапкыр, торак төзелеше – өчтән бергә, автомобиль юлларын төзү ике тапкыр артты. Шулай булуга карамастан, Рөстәм Хәмитов билгеләгәнчә, Башкортстанның, аның төбәкләренең, шул исәптән Урал аръягының җәлеп итүчәнлеген арытаба да үстерү буенча эшчәнлекне активлаштыру таләп ителә. Җәлеп итүчәнлек ул – инвестицияләр, эш урыннары, хезмәт хакы һәм салымнар дигән сүз. 2017 елда Башкортстан икътисадына салынган инвестицияләр күләме 300 миллиард сум тәшкил итте. Шуның 10 проценты гына – чит илләр капиталы, 90 проценты – үз предприятиеләребез акчасы. Инвестицияләр салына, яңа эш урыннары булдырыла.
Төбәктә әлеге юнәлештә “Урал тау-металлургия компаниясе”нең аеруча уңышлы эшләвен билгеләде республика Башлыгы. Яңа шахталар, баектыру куәтләре, социаль объектлар сафка кертелә. Форум алдыннан җыелучылар Урал аръягы районнарының, төбәктә эшләгән эре, уртача һәм кече бизнес предприятиеләренең инвестиция потенциалына багышланган күргәзмә белән танышты.
Рөстәм Хәмитов үзенең чыгышында шулай ук урман-сәнәгать комплексының уңышларын, аграрийларның мөмкинлекләрен, туризм кластерының матур киләчәген бәян итте.
Республикада әлеге вакытта кече малтабарлык субъектлары 140 меңнән артып китте. Әйтергә кирәк, соңгы чорда Башкортстанда малтабарлык проблемаларына игътибар артты. “Бүгенге шартларда кече һәм уртача бизнес икътисади хәлне тотрыклыландыра ала. Эре бизнес тулы куәтенә эшли, ә менә кечерәкләрнең үсеш мөмкинлекләре бар. Без аларга ярдәм итәргә тиешбез, һәм ярдәм итәбез”, – дип белдерде Рөстәм Хәмитов үзәк матбугатка биргән интервьюда. Малтабарлыкны тиешле югарылыкка күтәрү проблемасы Башкортстан үсешенә багышланган “Стратегия-2030” дип аталган документта да бәян ителә.
– Әлеге вакытта тулай төбәк продуктында кече һәм урта бизнес өлеше 31,8 процент тәшкил итә. Киләчәктә бу санны 36-37 процентка җиткерү планлаштырыла, – диде Рөстәм Хәмитов. Бу Русиядәге уртача күрсәткечтән 11,8 процентка күбрәк. Ә кече бизнестан казнага кергән салым узган ел 400 миллион сумга арткан. Икътисади торгынлык чорында бу – яхшы күренеш.
Үз чиратында, дәүләт тә, республика Башлыгы белдерүенчә, тармакны ярдәменнән ташламый. Мәсәлән, соңгы чорда казна ярдәме бераз кыскарса да, Башкортстан Хөкүмәте вәкилләре билгеләвенчә, кече бизнеска микрозайм алу мөмкинлекләре киңәйде. Чыннан да, республикада шундый займнар бирүче Үзәкнең активлары арттырылды. Элек ул 286 миллион сум белән эш итсә, хәзер сумма 350 миллионга җитте. Микрозаймның уртача күләме 765 мең сумнан 1,3 миллион сумгача артты. Әлегедәй форумнар малтабарлар эшчәнлегенә бар яклап та уңай тәэсир итә.
Республика Башлыгы ирешелгәннәрне саклап калу, булган мөмкинлекләрне файдаланып, үсешкә ирешү юнәлешендә эшчәнлекне активлаштырырга чакырды.
Идрис Сәетгалиев.