Республикабыз Русия көне, Салават Юлаевның тууына — 264, Уфа кальгәсенә нигез салынуга 444 ел тулуны билгеләде.
Русия көне – илебезнең яңа тарихын һәм дәүләтчелеген билгеләүче төп бәйрәм. Ул ватанпәрвәрлекне, фидакарь хезмәт, җәмгыятьтәге бердәмлек һәм татулыкны, икътисади һәм рухи яңарышны гәүдәләндерә. Русиядә яшәүче барлык халыкларның дуслыгын һәм уртак тарихыбызны чагылдыра.
1990 елның 12 июнендә “РСФСРның Дәүләт мөстәкыйльлеге турында декларация” кабул ителде. Бәйрәм буларак, ул 1992 елдан билгеләнә. Чөнки шул елның 11 июнендә Русия Федерациясе Югары Советы тарафыннан “Русия Федерациясенең Дәүләт мөстәкыйльлеге турында декларация кабул итү көне” карарына кул куела. Рәсми рәвештә “Русия көне” бәйрәме 2002 елның 1 февраленнән билгеләнә.
Русия, демократик-хокукый дәүләт буларак үсеш юлына басты, иҗтимагый тормышын федерализм принциплары нигезендә оештырды. Шушы чирек гасыр дәвамында Русия Федерациясе, үзенең дәүләт-челек нигезләрен төзеп, зур үсеш юлы үтте, дөньякүләм танылу яулады, абруй казанды.
Төрле милләт вәкилләренең үзара дус яшәвен күрсәтүче ил дә әле ул Русия. Ил Конституциясендә үк Русиянең күпмилләтле дәүләт булуы ассызыклана. Аның территориясендә 190нан (!) артык милләт вәкиле дус һәм тату гомер кичерә.
Бүген әлеге бәйрәм ватанпәрвәрлек хисләре белән дә сугарыла. Русия көне — милләтләр бердәм-леге, Ватаныбызның бүгенгесе, киләчәге өчен җаваплылык, илнең икътисади, социаль-сәяси һәм рухи үсешенең символы. Бүген демократик-хокукый дәүләт төзү, икътисадны, социаль һәм рухи-мәдәни өлкәләрне үстерү, яшәешебезнең сыйфатын яхшырту җәһәтендә күп эшләнелә. Әхлакый һәм рухи кыйммәтләрнең тергезелүе, Туган илнең оборонасын ныгыту һәм Җир шарында тоткан урыны күтәрелүе — сөенечле күре-неш. Кешеләрнең киләчәккә булган ышанычы ныгый, илдә гражданлык җәмгыяте үсешә. Күпмилләтле халыкларның бердәмлеген гәүдәләндерүче бу бәйрәм — чын мәгънәсендә бөтенхалык тантанасы.
Бу көн, һичшиксез, һәр башкортстанлы өчен зур бәйрәм булып тора. Русия Федерациясенең Дәүләт мөстәкыйльлеге турында декларация кабул ителгәннән соң Башкортстанның иҗтимагый-сәяси, социаль-икътисади тормышында җитди үзгәрешләр булды. Бүген Башкортстан — Русиянең һәрьяклап алга киткән субъектларының берсе. Республикабыз Русия төбәкләре арасында лаеклы урын тота, ил үсешенә, аның дәүләтчелеген ныгытуга зур өлеш кертә.
12 июнь — башкортстанлылар өчен өчләтә бәйрәм. Бу көнне республикада Русия көне, Салават Юлаевның тууына 264 һәм Уфа кальгәсенә нигез салынуга 444 ел тулу уңаеннан тантаналар үтте.
Уфа шәһәре турында 1574 елгы язмаларда ук искә алына. Бүген исә ул үзенең тарихы, мәдәни мираслары, күпмилләтле шәһәр булуы белән дә тирә-якта билгеле. Шул ук вакытта ул — Русиянең икътисади, мәдәни һәм фәнни үзәкләренең берсе. Халык саны буенча Европада 31нче урынны биләүче миллионер-шәһәр дә ул.
Тирән тарихлы шәһәребез белән кызыксынучылар саны арта. Аның Агыйдел елгасы буенда урнашуы да, кабатланмас матур табигате дә туристларны җәлеп итә. Әйе, гасырлар дәвамында шәһәр бик күп үзгәрешләргә дучар булган. Шунысы куанычлы: бүген исә шәһәр Европа стандартларына җавап бирерлек, яшәү өчен уңайлы шәһәрләр исемлегендә.
Республиканың зур юбилее уңаеннан барлыкка килгән “100 объект” башлангычы да башкаланың йөзен билгеләүгә зур өлеш кертте.
Башкала юлларын төзекләндерү республика һәм шәһәр җитәкчелегенең даими игътибарында.
Күпкатлы йортлар төзү, капиталь ремонт эшләре, гомумән, халыкны тораклы итү мәсьәләсе җитәкчелекнең эшчәнлегендә даими чагылыш таба.
Уфа — бик күп мәдәни мирасны саклап калучы шәһәрләрнең берсе.
Шәһәрнең “Профсоюзлар йорты” алдында халык шагыйре Мостай Кәримгә күптән түгел барлыкка кил-гән композиция дә — шәһәрнең кабатланмас бизәге.
Дистә еллар дәвамында башкаланың горурлыгы булган Салават Юлаев һәйкәле, “Лалә-Тюльпан” мәчете, Җиңү паркы һәм башка мираслар халык арасында даими кызыксыну тудыра. Алар башкала кунакларының, туристларның һәм чит төбәкләр вәкилләренең яраткан урынына әверелде. Чыннан да, бүген Уфа заман таләпләренә җавап бирүче ил тарихын чагылдыручы үзәк буларак билгеле.
Фәнүз ХӘБИБУЛЛИН,
Гөлия Гәрәева.