Саламатсыздарбы?! Менин атым Алина. Жашым 26де. Мен жүрөк өйүткөн маселени сиздер менен бөлүшүп, кеңеш суроону туура көрдүм. Анткени, бул маселени өзүм чече албасыма көзүм жетти. Мүмкүн, сиздер бир айласын таап, жардам берет деген терең ишенич менен жазып жатам.
Мен мындан 3 жыл өзүмдүн сүйүктүүмдү кезиктирдим. Мен жаңы окууну бүтүп, жумуш издеп жүрүп бир компанияга кассир болуп жумушка орноштум. Ошол жерден азыр сүйлөшүп жүргөн жигитим менен тааныштым.
Башында аны жумуштагы кесиптеш катары кабыл алып жүрдүм. Бирок, кийинчерээк экөөбүздүн мамилебиз кандайча жакын болуп кеткенин байкабай калдым. Муну анын мага жасаган камкордугу, мээримдүүлүгү, бир сөз менен айтканда эркектик сапаты менен түшүндүрсөм болот. Экөөбүз бири-бирисиз жашай албайт экенибизге көзүбүз жетип, үйлөнөлү деп чечтик.
Ушул жерден бир нерсе менин тынчымды алат, себеби жигитим орус улутунан болгондуктан, ата-энем аны кандай кабыл алат деген суроо ойлондуруп жатат. Атам дин жолундагы адам жана ал муну туура кабыл албасы айдан ачык. Анын эмне деп айтаарын сезип, билип жатам. Ал жигитим ислам динин кабыл алганда гана макул болорун билем.
Бир жолу ушул маселе тууралуу жигитиме четин чыгарып айтып көрдүм, бирок ал мени түшүнгөнү менен мындай жолго бара албасын айтты. Бир жагынан анын айткандары деле туура. Аны мажбурлап башка динди кабыл алышын мен деле каалабайм. Ал ичимдик ичпесе, тамеки чекпесе, туруктуу иштеген иши болсо, мени сүйсө мага андан башка дагы кандай адам керек?
Ал – мен үчүн эң башкысы жакшы адам. Мен деле кудайга ишенем, бирок мусулман эмес адамга күйөөгө тийүүнү кылмыш деп санагандарды түшүнө албай келем. Бир келген жашоодо сүйгөн адамың менен бирге болуунун эмнеси жаман? Эртеби-кечби баары бир ата-энеме айтыла турган нерсе, бирок мына эми айтайын деп барып эле эмнегедир кийинкиге жылдырып коюп жатам. Мүмкүн, чын эле атамдан каарынан коркуп жатат окшойм. Акыркы күндөрү бул ой мени жеп, түнкүсүн уйку бетин көрбөй келем.
Менде азыр абдан оор абал. Сиздерден кеңеш берүүнү суранам. Мен эмне кылууну билбей калдым. Суранам, жардам бериңиздер, кеп-кеңештериңиздер менен бөлүшүңүздөр. Мен ал адамды сүйөм... Ансыз жашай албайм. Эмнеге тагдыр ушундай?...
