Тил үйрөнүүнүн, өзүбүз ойлоп таап алган кыйынчылыктардан башка эч кыйынчылыгы жок. Като Ломб – эң биринчи синхронддуу котормочулардын бири, ал 16 тил билген. Төмөндө Като Ломбдун чет тилин үйрөнгүсү келгендерге кыска, ары нуска кеңештерин сунуштайбыз.
1. Жаңы тил үйрөнүү үчүн ал тил менен күндө алектенүү керек. Айрыкча эртең мененки убактар пайдалуу болот. Убакыт жетпей жатса, жок дегенде 10-15 мүнөт бөлүп, бир нерсе окуу керек же өткөн сөздөрдү кайталоо керек.
2. Тил үйрөнүүгө болгон кызыгуу жоголуп баратса, өзүңүздү зериктирбөөчү бир ыкма ойлоп табыңыз. Мисалы, үйрөнүп жаткан тилиңизде музыка угуңуз, фильм көрүңүз, кичине эс алып сейилдеп келиңиз, андан кийин кайра улантыңыз. Бирок, эч качан таштап койбоңуз.
3. Сөздөрдү өз-өзүнчө жаттабаңыз. Текст кылып, башкача айтканда сүйлөмдөп жаттоого аракет кылыңыз. Мисалы “strong wind”, бир сөздү эстегениңизде экинчи сөз өзү автоматтуу түрдө келет.
4. Сүйлөмдөрдү жазып жүрүүнүн жана аларды көп колдонуунун пайдасы зор.
5. Көргөн нерселериңиздин баардыгын ичиңизден которуп жүрүңүз. Мисалы, көчөдөгү жарнамалардын тексттерин, ырлардын сөздөрүн, гезиттеги макалалардын темасын ж.б. Бул мээни машыктырат, жатталган сөздөр колдонула баштайт.
6. Кичинекей тексттерди, диалогдорду жаттап алуу пайдалуу. Бирок, жаттаган тексттин туура, башкача айтканда катасыз жазылганына көңүл буруңуз.
7. Колдонулган фразеологиялар менен сөз айкаштарын да милдеттүү түрдө жазып алып, жаттап алуу керек.
8. Чет тилин өз алдынча үйрөнүү абдан кыйын. Тил үйрөнүү үчүн баардык ыкмаларды колдонуу керек. Үйрөнүп жаткан тилиңизде фильм көрүңүз, китеп окуңуз, ошол тилдеги басылмаларды, интернет ресурстарды окуп туруңуз, же ошол тилде сүйлөгөн адамдар менен баарлашыңыз.
9. Каталардан коркпоңуз, оңдолбогон катадан коркуңуз. Эч нерсени текшерүүсүз калтырбаңыз, үйрөнгөн нерсеңиздин туура экендигине жакшылап көз жеткириңиз.
10. Сиз бул тилди үйрөнүп аларыңызга ишениңиз. Ошондо сан сапатка алмашып, үйрөнүп жаткан тилиңизде белгилүү бир даражага жетесиз.