Канадалык дарыгерлер адам терисин калыбына келтирүүгө арналган ылдам иштөөчү 3D-принтерди тааныштырды. Бул түзмөктүн өзгөчөлүгү адамдын күйүп калган терисин саналуу мүнөт ичинде калыбына келтире алат.
Бул тууралуу Engadget басылмасы кабарлайт.
Торонто университетинин окумуштуулары кураштырган принтер “U of T bioprinter” деп аталат. Кичинекей болгон түзмөк дененин күйүп калган жерин саналуу мүнөт ичинде айыктыра алат. Ал үчүн принтерге биологиялык материал салынып, ал жасалма тери кесиндисине айланат. Ал эми дарыгерлер ушул тери кесиндисин адам денесинин күйүп калган жерине жамап беришет.
Убакыттын өтүшү менен мындай тери денеге көнүп, жараны бүтөйт. Адистердин сөзүндө, U of T bioprinter принтери колдонууга киргизилгенден кийин, дарыгерлерге тери донору керек болбой калат. Долбоордун катышуучусу Навид Хакиминин сөзүндө, принтер тууралоолорун адам денесиндеги күйүктүн даражасына карата өзгөртсө болот.
Окумуштуулар түзмөктү сынактан өткөрүп, аны доңузга колдонуп көрүштү.
Эми дарыгерлер келечекте принтерди адамдарга колдонууну пландап жатышат.