Украинанинг «Футбол 24» нашри «Барселона» – «Реал» (2:2) ўйинида юз берган ва ҳакамнинг эътиборидан четда қолган бир қанча вазиятларни келтириб ўтди - агар Испанияда ҳакамларнинг видео-ёрдамчиси тизими (VAR) ишлаганида, ҳисоб умуман бошқача бўлиши мумкин эди.
Биринчи вазият. Месси Марсело билан курашда тўпни қўли билан ўйнади, бундан ташқари рақибининг орқасига мушт туширди. Сариқ карта? Йўқ, ҳеч нарса.
Иккинчи вазият. Ракитич Каземиронинг оёғини босиб олди. Иван рақибга оғир жароҳат етказиши мумкин эди, бироқ ҳатто сариқ картани ҳам олмади. 85-дақиқада эса яна бир қўполлиги учун сариқ карта билан жазоланиши керак эди, аммо бу сафар ҳам сувдан қуруқ чиқди.
Учинчи вазият. Бэйл Умтити оёғига орқадан зарба берди - шубҳасиз «қизил». Аммо, ҳеч қандай жазога тортилмади. Кейинчалик эса барибир сариқ карта олди. Тан олиш керак, Бэйл ўйинни охиригача ўтказмаслиги шарт эди, бироқ жамоасини мағлубиятдан қутқариб қолган голни урди.
Тўртинчи вазият. Жорди Альба Лука Модрични томоғидан бўғди, аммо бу сафар ҳам жазо қўлланмади. Бош ҳакам Варанга кўрсатилган сариқ картани дафтарчасига ёзаётгани туфайли, вазиятни кўрмай қолди.
Бешинчи вазият. Коутиньо орқадан Марсело оёғини босиб олди. Бу вазиятда тўп учун кураш кетмаётган эди. Футболчи ватандошига нисбатан нега бундай қилганини тушуниш қийин.
VAR тизимини келаси мавсумдан бошлаб, Примера ўйинларига жорий қилиш бўйича жавобгар бўлган Веласко Карбальо «Барселона» - «Реал» ўйини қандай ҳисоб билан якунланиши борасидаги фикрларини айтди.
Голлар бўйича: Луис Суарес томонидан Варанга нисбатан ишлатилган қоидабузарлик учун, Мессининг голи инобатга олинмас эди. Альба томонидан Марселога ишлатилган қоидабузарлик учун эса пенальти белгиланиши шарт эди. Умумлаштирадиган бўлсак, ҳисоб 2:2 эмас, балки «Реал» фойдасига 3:1 бўлиши мумкин эди.
Четлатишлар бўйича: Месси ва Бэйл майдондан четлатилиши шарт эди. Ракитич ва Коутиньо ҳам бундай жазога лойиқ кўрилиши мумкин эди.