ÇAĞANIN TƏRBİYƏSİ
1
Uşağın həyatında tərbiyənin qəbul edilməsi üçün “hələ tezdir” anlayışı yoxdur. Yeni doğulmuş körpənin ruhu – hələ heç bir ekspozisiyaya məruz qalmamış fotoqrafik lövhəyə(lentə) bənzəyir: ora düşən hər bir təəsürat həkk olunur; sonrakı təəsüratlardan heç biri bu cür həkk ola bilməyəcək. Bu səbəbdən də, valideynləri və ya tərbiyəçiləri uşağa çağa vaxtından təsir etmək imkanını əldən versələr, onlar həyatlarındakı ən böyük imkanı itirmiş olacaqlar.
Şərqdə inanc var ki, arzuolunmaz insanı çağanın yanına buraxmaq olmaz. Əgər valideynləri və ya qohumları hesab edirlərsə ki, hər hansı bir insan çağaya yaxınlaşmamalıdır, bu o səbəbədir ki, çağa – fotoqrafik yaddaşa malikdir. Çağanın ruhu neqativdir, o, hər bir təsirə həssasdır; beləliklə, ruha düşən ilk təsürat, orada həkk olunur.
İlk olaraq, körpə dünyaya mələklər və cinlər aləmindən təsirlənmiş ruh ilə gəlir; bununla yanaşı, o, öz valideynlərinin və onların ailələrinin müəyyən dünyəvi xüsusiyyətlərini də miras olaraq qəbul etmişdir.
Çağa, dünyaya gəlişindən sonra ilk təəsüratları ətraf mühitdən, şəraitdən, ona toxunanlardan, onu əhatə edən mühitdə hərəkət edən və işləyən hər bir şeydən və hər bir kəsdən alır. Və dünyaya gəlişdən sonrakı bu ilk təəsürat o qədər güclü olur ki, çox zaman, körpənin mələklər aləmindən gətirdiyi və valideynlərindən irsi olaraq aldığı bütün təəsüratları silib, tamamilə yox edir. Bu ona görə baş verir ki, çağanın yuxarı aləmlərdən aldığı təfəkkür pozitiv deyil. O , daha çox, gildən düzəlmiş qaba oxşayır ki, hələ yanma mərhələsini keçməyib; o, hələ inkişaf etməyib.
Valideynlərindən irsi olaraq aldığı xüsusiyyətlər də, hələ ki, neqativ halındadır, onlar yalnız körpənin dünyaya gəlişindən sonra püxtələşməyə başlayır. Çağaya hücum edən ilk təəsüratların bu qədər güclü təsirə malik olmasının səbəbi də elə budur. Qabların hazırlanmasında ilk mərhələ - onları gildən yapmağdır, hazırlanmanın ikinci mərhələsi – onları oda qoymaqdır. Onları alova verdikdə, onlar möhkəmlənirlər, pozitiv olurlar; oda verilməmişdən əvvəl, onlar neqativdirlər, yəni təsirə həssasdırlar.
Eynilə bu cür, fotoqrafik lövhə(lent) də ilk olaraq neqativdir; sonra isə, müəyyən təsirə məruz edildikdə pozitiv olur. Uşağın ruhu da çağa vaxtında məhz bu cür hazırlanma mərhələsi keşir; bir sözlə, o, müəyyən inkişaf dövrü keçir. Körpənin ali aləmdən gətirdiyi də, irsi olaraq qazandığı da fotoşəkil kimi aşkarlanır, neqativdən pozitivə çevrilir, möhkəmlənir, gələcək formasını alır; çünki bu – ruhun formalaşma və pozitivləşmə zamanıdır. Əgər çağa həmin zamanda arzuolunmaz təəsürata məruz qalsa, sonra ona hansı təlimlərin veriləcəyindən asılı olmayaraq, bu ilk təəsürat onda möhkəmlənəcək. Heç kəs onu silib atmaq qüdrətində deyil, çünki çağalıq – ruhun aşkarlanma vaxtıdır.
...Ardı var..