Бұл туралы ақын өзінің Facebook әлеуметтік желісінде жариялады.
– Мұхтар аға Шаханов «үндеуінен», рас, тіксініп қалдым. Жетер межеге жеткен соң, əдемі қартаю да өнер емес пе? Біз жастана оқып өскен, сүйегі қурап үлгерген классиктердің шындықтарын ашқан бопты… Əуезов һəм Мақатаев пен Мырзалиевтер үшін күйіп отырмын, – деп жазды Д. Айманбетов.
Сондай-ақ Д. Айманбетов өз жазбасында қазіргі таңда əдебиетке деген қызығушылықтың жоғалып, оқырман талғамының төмендеп бара жатқанын ашына жеткізген.
– Мұхтар ағам періште емес! Көзі кеткен соң болашақ орнын басар қаламгерлер өзінің əруағын мазаласа ше? Пенде болған соң кез келген жұмырбастының пендешіліктері болады ғой?! Біз, онсыз да əдебиетке деген қызығушылығын жоғалтқан, оқырман талғамы төмендеген заманда, Есентаева, Байзақова, «91» дегендерге бас ұрып жүрген жастар қаптаған заманда өскелең ұрпақты аты аталған ақиық, дара тұлғаларымыздың пендешіліктерін, көзге ұрар шындықты айтамыз деп шошытып алмаймыз ба? Осы бізге керек пе?
Қазақ үшін еңбегі орасан (тізе берсем шатасамын) ғасыр ақыны, шыншыл М. Шаханов «үндеуіндегі» аты аталған тұлғалар оқырмандарының көңіліне қаламын деп ойламады ма екен? Оразалинмен жеке бас араздығы арқылы руы бір болған соң ақиық Мақатаевқа ауыз салды деген пікірде көп оқырман.
Жазарын жазып қойды. Артық жазуға болмайтын секілді менің Шахановыма. Жасарын жасап қойды. Артық жасаса Жабаев күйін кеше ме деп қорқам. Əрине, Алла біледі кімнің қашан кетерін. Дегенмен, ендігі шындық туралы емес, парасаттан махаббатқа қайта көшсе екен көкем, – деді ол.
Еске сала кетсек, жуырда белгілі ақын Жанарбек Әшімжан Facebook желісінде Мұқағали Мақатаев туралы Мұхтар Шахановтың даулы өлеңін жариялаған еді. Бұл өлең оқырмандардың қызу талқысына түсіп, Шахановтың атына бірталай сын айтылды. Жанарбек Әшімжан ол өлеңді «Қазақ поэзиясының даңқты тұлғасы Мұқағалидың әруағына тас ату» деп бағалаған болатын.