Туймазы районының Төмәнәк авылы мәдәният йортында үткән “Туган телем – иркә гөлем” дип аталган кичә татар теленә багышланды. Зур бәйрәмгә авыл халкы, кунаклар килгән иде.
Мәдәният йорты директоры Раушания Зарипова җитәкчелегендәге “Рухият” милли уен кораллары фольклор ансамблендә мәктәп укучылары шөгыльләнсә, “Төмәнәк йолдызлары”на теләге булган һәркем йөри. “Ядкәр” – авылдагы җыр сөюче ир-егетләрне туплаган вокаль ансамбль. Аларның чыгышын тамашачы һәрвакыт яратып кабул итә.
Гомумән, кичәдә балаларның да, өлкәннәрнең дә бердәй катнашуы шатлыклы. Авыл мәктәбе укучылары шигырь дә укыды, дәртле биюләр дә бүләк итте, “Шатлык” балалар вокаль ансамбле халык җырларын башкарды.
Туймазыдан килгән кунаклар – “Асылъяр” вокаль һәм “Ялкын” бию ансамбльләре белән беррәттән, ут күршеләр – Шаран районының Ярәмкә авылы үзешчәннәре дә сәхнә тотты. Ике мәдәният йорты әнә шундый алмаш чыгышларны еш ясый.
Кичәне Ләйлә Җәмгытдинова белән Динар Муллагалиев алып бардылар.
Ветеран-укытучы Земфира Фәрхетдинова көндәлек тормышта туган телне куллану даирәсе кимүгә, телебезнең чит сүзләр белән чуарлануына борчылу белдерде. Тамашачыларның тел турындагы мәкальләрне искә төшерүе шатландырды.
Кичә ахырында барчасының да хор белән “Туган тел” җырын башкаруы милли чарага матур нокта куйды.