Бүгүн, 23-октябрга караган түнү Баткен облусунун Кызыл-Кыя шаарынын Жинжиген айылында улгайган жубайларды күйөө баласы балта менен чаап, экөө тең оор абалда ооруканага жеткирилди. Бул тууралуу аймактык кабарчыга милициядан билдиришти.
Маалыматка караганда, жубайларды 33 жаштагы кичүү күйөө баласы чапкан. Ал кайын ата, кайын энесинин үйүндө жашачу. Күйөө бала 3 күн катары менен арак ичип, үйдө кайын ата, кайын энеси менен пикир келишпестик чыккан. Чыр чыккан учурда аларды балтанын арты менен чаап жиберген. Бул окуядан кийин үйдөн чыгып кеткен. Учурда милиция кызматкерлери тарабынан издөө иштери жүрүп жатат.
Кызыл-Кыя шаардык ооруканасынын маалыматына караганда, ооруканага 1949-жылы туулган К.А. (күйөөсү) менен 1956 жылы туулган А.Т. (аялы) түшкөн. Күйөөсүнүн 2 колунун сөөктөрү жабык түрдө сынып, баш мээси чайкалган. Учурда сыныктар бөлүмүндө жатат. Аялынын баш сөөгү сынган. Абалы оор болгондуктан жандандыруу бөлүмүндө жатат. Учурда жубайлар дарыгерлердин көзөмөлүндө дарыланууда.
Ал эми Баткен ОИИБдин маалыматына караганда, күйөө бала мындай кадамга кайын журту үйүнөн кубалап чыккандан кийин барган.
«23-октябрда саат 04:45 чамасында Кызыл-Кыя ШИИБдин нөөмөт бөлүмүнө Кызыл-Кыя шаардык ооруканасынан Жинжиген айылындагы 69 жаштагы күйөөсү менен 62 жаштагы аялы денесинен жаракат алып жеткирилгени жөнүндө кабар келген. Алынган маалымат ошол замат Кызыл-Кыя ШИИБге катталып, окуя болгон жерге ыкчам-тергөө тобу барган. Иликтөөнүн жүрүшүндө кылмышты ноокаттык күйөө бала жасагандыгы такталды. Ал кайын атасынын үйүнө кирип, уктап жатышкан кайын атасы менен кайын энесин колдоруна жана баштарына өзү менен кошо алып келген балтанын арты менен чаап, оор залал келтирген. Андан кийин окуя болгон жерден качып кеткендиги аныкталды.
Жогорудагы жагдай боюнча сурамжылоо учурунда 26 жаштагы шектүү жабырлануучулардын кызына үйлөнгөндөн кийин кайын атасынын үйүндө жашап жүргөнү такталды. Ал спирт ичимдигин көп ичкендиктен окуядан 5-6 күн мурун кайын атасы үйүнөн кууп чыккан. Ал үчүн өч алуу максатында жогорудагы кылмышка баргандыгы аныкталды. Азыркы учурда тиешелүү экспертизалар дайындалып, аны издөө иштери жүрүп жатат», - деп айтылат маалыматта.
Күйөө бала кармалды:
25-октябрда Баткен ОИИБдин басма сөз кызматы күйөө бала Кызыл-Кыя шаарынын аймагында мечиттердин биринде жашынып жаткан жеринен кармалгандыгын кабарлады. Кармалган адам убактылуу кармоочу жайга киргизилди. Аталган факты боюнча тергөө иштери жүргүзүлүүдө.