Байлар Сабасында иң зур кабак үстерүчеләр, әлеге яшелчәдән телеңне йотарлык бәлеш пешерүчеләр катнашында бәйрәм үткәрелә башлаганга 15 ел гомер узган. Әлеге чарага районыбызда быел аеруча зурдан кубып әзерләнделәр һәм ул “КабакБай” республика фестивале статусын алды. Тамаша күрергә олысы-кечесе чыкты. Балалар өчен күптөрле уен мәйданчылары фестивальнең гаилә бәйрәме буларак ролен тагын да арттырды. Гомумән, кабактан ясалган сокландыргыч композицияләрнең күбесе балалар бакчалары, мәктәп коллективларының хезмәт җимеше икәнлеген күргәннән соң чараның яшь буынга тәрбияви йогынтысы бәяләп бетергесез булуын яхшы аңлыйсың.
Бәйрәмнең масштабын Сабинка яры башыннан да чамалап була иде. Парклар һәм скверлар елында төзекләндерелә башлаган елга буе үзгә тамаша мәйданы хәзер. Фестивальнең максаты турында алып баручы, танылган тамада Руслан Гыйльметдинов: “Проект үзенең эчтәлеге белән республиканың эчке туризмын үстерүне, яшьләрне авыл җирендәге актив эшчәнлеккә җәлеп итүне, татар халкының традицияләрен популярлаштыруне, фестивальнең чит төбәкләрдә дә әһәмиятен арттыруны күздә тота. Һәм без оештыручыларга бүгенге бәйрәм өчен зур рәхмәтле”,– дип сөйләде.
Катнашучыларны бәйрәм белән Саба муниципаль районы башлыгы урынбасары Расих Закирҗанов тәбрикләде. Халыктан кабактан ясалган күргәзмәләр, пешерелгән ризыклар белән хозурланган арада комиссия дә эшкә кереште. Өч йөз сумлык билет алган балалар барлык конкурсларда катнаша алды, түләүсез генә батут та сикерде, кабартылган тауда шуды, кидспейс шәһәрчегендә шөгыльләнде, боулинг уйнады.
“Арсенал” укыту үзәге мастер-класс үткәрде. Карвинг ярышы (яшелчәне нәфис уеп кисү) олыларны да кызыксындырды. Ул арада сәхнәгә кабак турында үзләре язган шигырьләрен укучылар чыкты. Фестивальнең чын мәгънәсендә республика масштабында узганлыгы җиңүчеләрне бүләкләгәндә ачыкланды. Әйтик, Әлмәттән килгән 10 яшьлек Алтынбай Гарифуллинны сәхнәгә өч тапкыр чакырдылар. Егет шигырь сөйләүдә, рәсем ясауда приз алды һәм кабак турында иң күп наклейканы да ул җыйган иде. “Бәйрәм турында ишетеп, махсус килдек. Бик күңелле, улым биредә бар яктан да ачылды”,– диде Алтынбайның әнисе. “Шигърият” номинациясе җиңүчесе булып та Казан кунагы Нина Җигалова танылды. Теләчедән Ләйлә Ибраевага 2нче урын бирделәр. Бәйрәмне районыбыз үзешчәннәре белән берлектә эстрада йолдызы Цезария Саид чыгышы ямьләндерде. “Җыр” номинациясендә I дәрәҗә Дипломны Шекшедән “Зиләйлүк” ансамбле алып китте. Жирле үзидарәләр оештырган кабак күргәзмәләре белән җентекләп танышкан җюри авыл җирлекләре һәм учреждениеләр арасында 1нче урынга Югары Утар балалар йорты-интернатын чыгарды. Әлеге номинациядә шулай ук “Шоколад” балалар бакчасы (мәктәпкәчә учреждениеләр) һәм Саба гимназиясе (мәктәпләр) җиңде. Иң зур кабакны “Балачак” балалар бакчасында үстергәннәр иде. Алып килгәндә кабыгына 42 кг. дип язылган булса да, электрон үлчәү аны 37,7 килограмм итеп күрсәтте. Әмма 4 килоны юкка чыгуы “Балачак”ны иң төп бүләк – 5 мең сумлык акчалата приздан мәхрүм итмәде. Гимназия укучысы Адилә Сөнгатуллинаның 2нче урынга лаек пәвлеваны 34,5 кило килде. Теләчедән Гүзәл исемле кыз калдырып киткән 32,8 килолы кабакка исә 3нче урын бирделәр. Алып баручылар фестивальне оештыручы өчен төн йокыларын калдырган “Ассель” турагентлыгы җитәкчесе Тамчыгөл Вәлиевага тамашачылар исеменнән зур зур рәхмәт белдерделәр. “Без күрше районнар белән дә әле сирәк аралашабыз. Бу яктан караганда, “Кабакбай” үзенең максатына иреште. Бик матур проектка нигез салынды, дәвамы да эчтәлекле булсын”,– диде шәхси эшмәкәр.
Фәнил Мәүлетов
Фестивальгә 1,2 тоннага якын кабак алып килгәннәр иде. Күргәзмәләргә 115 кабак бәлеше һәм башка төрле яшелчә сые куелды.
Фоторепортажны saby-rt.ru сайтыннан карый алачаксыз!