Մենք թեկնածու չենք ներկայացնում, որովհետեւ նույնիսկ եթե այդ թեկնածուն հաջողության հասնի, նորից պիտի կռիվ գնա, թե ով պիտի լինի Երեւանի քաղաքապետ։ Այս մասին այսօր՝ օգոստոսի 28-ին ԱԺ–ում լրագրողների հետ զրույցում նշեց ՀՀԿ խմբակցության պատգամավոր Գալուստ Սահակյանը։
Հարցին՝ ՀՀԿ–ում ո՞ւմ են տեսնում Երեւանի քաղաքապետի պաշտոնում, Գալուստ Սահակյանը հրաժարվեց պատասխանել. «Էդ չեմ ասի»։
Արձագանքելով խոսակցություններին, թե խոսակցություններ կան, որ ՀՀԿ–ն սատարում է Արտակ Զեյնալյանին, պատգամավորը նշեց. «Որեւէ բան ասել չեմ կարող, բայց հարգում եմ Արտակ Զեյնալյանին»:
Նա համոզմունք հայտնեց՝ ՀՀԿ–ն տվել է քաղաքապետներ, որոնք շատ լավ են աշխատել, այդ թվում՝ Տարոն Մարգարյանը։ «Իշխանությունը փոխվել է, ցանկանում են նաեւ քաղաքապետարանն ունենալ։ Բնականաբար, գտնում եմ, որ կարող են ունենալ, ինչ է պատահել»,–եզրափակեց Գալուստ Սահակյանը։
Նույն խնդրին անդրադարձել է նաեւ ԱԺ փոխնախագահ Էդուարդ Շարմազանովը՝ նշելով. «Երեւանի ավագանու ընտրություններին մեր չմասնակցելը պայմանավորված է մի շարք հանգամանքներով, նախ եւ առաջ նրանով, որ Հայաստանում այսօր հետիշխանափոխական իրավիճակ է, հիմնական թատերաբեմը ԱԺ-ն է եւ ավելի կարեւոր արտաքին եւ ներքին մարտահրավերներ կան Հայաստանի համար, քան ՏԻՄ ընտրությունները»:
Դիտարկմանը, երբ իրենց կուսակցությունը իշխանություն էր, ինքը հորդորում էր ընդդիմությանը մասնակցել ՏԻՄ ընտրություններին, Շարմազանովը պատասխանեց` միշտ չէ, որ իր կարծիքը կուսակցությունում մեծամասնություն է լինում: