Балтач районының Кизгәнбаш авылы якташларын һәм чит район кунакларын бәйрәмгә җыйды.
Узган шимбәдә Балтач районының Кизгәнбаш авылында “Саумысыз, якташлар!” бәйрәме үтте. Инде берничә тапкыр үткәрелгән бу чара башка авылларда үткән мондый бәйрәмнәрдән берникадәр аерыла.
Бәйрәмне шушы авылда туып-үскән, бүген Ижевск шәһәрендә яшәүче “Иждрил Холдинг” компаниясе директоры Флорид Фәйрушин оештырган. Быел спонсорлар исемен биредә туып-үсеп, чит өлкәдә яшәүчеләр Илдар Валентинов һәм Равил Гәрәев та тулыландырды.
Быел авылга нигез салынуга 240 ел тулды. Бәйрәмгә әзерлек эшләре дә авылны төзекләндерүдән башланды. Шушы чара кысаларында авылның 14 кешесенә “Авылның шәрәфле шәхесе” исеме тапшырылды. Шулай ук, биредә яшәүче 80 яшьтән өлкәнрәк булганнарга һәм яңа гына гаилә коручыларга бүләкләр тапшырылды.
Бәйрәмне Башкортстанның һәм Татарстанның сәхнә йолдызлары Зөһрә Шәрифуллина, Иркә, Ризат һәм Зинира Рамазановлар, Фәридә һәм Роберт Тимербаевлар, Айдар һәм Алмаз Юнысовлар, Илмира Нәгыймова, Руслан Кираметдинов, Мирхәт Гайсин, Марат Шәйбәков һәм башкаларның концерты дәвам итте.
- Флорид Зөфәр улы мондый бәйрәмнәр үткәреп кенә калмый, авылга башка төрле ярдәмне дә даими күрсәтеп тора. Чит өлкәдә шундый якташларыбыз булуы белән горурланабыз, - диде Түбән Карыш авыл Советы рәисе Әнәс Шәяхмәтов.
- Кизгәнбаш - Борай районының мин туып-үскән Карагош авылы белән чиктәш. Шуңа да монда мин үземне туган авылымдагы кебек хис итәм. Безнең Борай, Балтач, Тәтешле районнары халкы мәдәнияткә гашыйк булуы, шул ук вакытта гадилеге, аралашучанлыгы белән аерыла. Артистлар үзләре дә биредә ял итә, - диде сәхнә йолдызы Фәридә Тимербаева.
Дүрт сәгатьтән артык барган концерттан соң биредә яшьләр өчен дискотека оештырылды. Бәйрәм салют белән тәмамланды.
Гөлия Гәрәева.
Фото: Автор фотосы