Нинди сере бар икән Ямады авылының? Беренче карашка, берни белән дә аерылмый кебек үзе — шул ук урамнар, бизәкле тәрәзәләр, төтен чыккан морҗалар. Әллә инде чыннан да суы серле микән? Ямадыда булган саен шушы уйлар баштан үтми калмый.
Шулай инде, танылган кешеләр чыккан авылларга безнең караш башка. Гел генә шушы “серлелекне” эзлибез, шагыйрьне — шагыйрь, рәссамны — рәссам, артистны артист иткән сәбәпләрне күрәсебез, тоясыбыз, аңлыйсыбыз килә. Тирәнрәк уйласаң, шушы гадилек, авыллык аларны нәкъ шундый бөек иткәндер дә, шушындый гадилектән туадыр ул талант. Үзе гади, үзе бер дә гади булмаган Ямады авылыннан бик күп талантлар чыккан. Бертуган Юзеевлар, танылган рәссам Эрот Зарипов һәм башкалар.
Июнь аеның соңгы көннәрендә Яңавыл туфрагында үткән бәйрәм дә “Ямадының асыл уллары” дип аталган һәм ул Татарстанның халык шагыйре Илдар Юзеевның тууына 85 ел тулуга, Татарстанның атказанган сәнгать эшлеклесе Эрот Зариповның 80 яшьлек юбилеена багышланган иде.
Авыл бу көнне гөрләп торды, ихаталар кунакларны кабул итте. Ике танылган шәхеснең туганнары, якыннары да очрашуга кайтмый калмады. Шулай ук Башкортстан Язучылар берлегеннән, Татарстаннан күренекле сәнгать эшлеклеләре бар иде. Кунаклар авыл мәктәбендә, Илдар Юзеевның музеенда булды. Мәктәптә Эрот Зариповның эшләреннән торган күргәзмә оештырылган иде. Тамашачылар сәнгать дөньясы белән генә түгел, танылган рәссамның күңел дөньясы белән дә танышты. Чөнки ни генә димә, талант ияләренең әсәрләрендә аларның үз күңелләре дә чагылыш таба.
Ә инде кичен халык авыл клубына, “Ямадының асыл уллары” дип аталган кичәгә җыелды. Клуб халык белән шыгрым тулы иде. Тантананы, кунакларны кайнар сәламләп, Яңавыл районы хакимияте башлыгы Илшат Вазигатов ачып җибәрде. Ул яңавыллыларның күренекле якташлары белән һәрвакыт горурланып яшәвен белдерде, шушындый данлыклы шәхесләр үстергән авылларга рәхмәт әйтте.
Авыл халкы бу көнне истәлекләргә бирелде, танылган якташлары турында хатирәләр белән уртаклашты. Сәхнәдән Илдар Юзеев сүзләренә язылган җырлар агылды. Тамашачыларга “Сез кабызган утлар сүрелмәс” дип аталган китап күргәзмәсе дә бик ошады. Кыскасы, искиткеч җылы, ямьле, эчтәлекле кичә булды ул. Авыл халкы исеменнән чыгыш ясаучылар бик күп булды. Авылдашлар шушындый ямьле чараны оештыручыларга рәхмәт белдерде.
Әлеге кичәдә Илдар Юзеев белән Эрот Зарипов беразга гына булса да туган авылларына кайтып киткән шикелле булды. Хәер, алар биредән китмәгән дә булса кирәк, җаннары, рухлары туган авылларында яшидер. Шушы бизәкле тәрәзәләрдә, менә-менә серкә очырачак арыш басуларында, юл читендәге ап-ак ромашкаларда, алмагачларга кунып иртәнге җырын сузган сандугач моңнарында...
Гөлнара ГЫЙЛЕМХАНОВА,
“Кызыл таң”ның үз хәбәрчесе.
Яңавыл районы.