Тез жардам келгенче төмөндөгү кеңештерди пайдаланыңыз.
Биринчи кадам – ашказанды жуу керек.
* Ал үчүн 0,5-1 литрдей марганцовка эритмесин ичиңиз. Аны даярдоо үчүн 1 литр кайнаган жылуу сууга 2-3 чымчым марганцовка аралаштырыңыз. Аз-аздан уурттап барын ичип түгөтүү керек. Эритмени ичип болгондон кийин кускуңуз келет. Аны кармап калбаңыз.
* 1 литр кайнатылган жылуу сууга 1 чай кашык туз аралаштырыңыз. Эриген соң ичесиз. Бул эритиндини ичип болгон соң кускуңуз келип, жүрөгүңүз айланат. Эгер андай тынчсызданууну сезбесеңиз, сөөмөйүңүздү оозуңузга салып кусууга аракет кылыңыз.
Экинчи кадам
* Мындан кийин дары кабыл аласыз. Салмагыңызга карап, 10 килого 1 даана активдештирилген көмүр же көрсөтмөсүнө карай "Полифепан", "Полисорб", "Энтеросгель", "Регидрон" же "Смекта" порошогун даярдап ичиңиз.
Үчүнчү кадам
* Суюк демделген көк чай, же лимон кошулган таттуу чай ичиңиз. Бул да өз кезегинде суусузданган ашказанды калыбына келтирет. Ошондо да, жүрөгүңүздүн айланганы басылбай, кусуп кыйналсаңыз, анда муздак суу ичиңиз. Суу бөйрөктөгү ашыкча заттар менен ууну чыгарат, ары ашказандын ишин активдештирет.
Төртүнчү кадам
Бөлмөлөрдү желдетип алып, ордуңуздан турбай жатуу керек.
Эсиңизде болсун!
Дарбыздан ууланып калган учурда эч качан ооруну басуучу, дене табын түшүрө турган дарыларды кабыл албаңыз. Дары ооруңузду күчөтүп жибериши мүмкүн.
Дарбызды тандоо кыйын эмес
Көбүнчө 8 килодон ашык чыккан дарбыз сатып албаңыз. Канча чоң болгон сайын анын курамында дары менен нитрат көп болот. Жулунган жери кургак болсо дарбыз таза бышкан болуп эсептелинет.
Өзүңүзгө жана үй-бүлө мүчөлөрүнө эң коркунучсуз дарбызды август жана сентябрь айларында сатып алыңыз.