Время Новостей

✒️ На нашем сайте запущен специальный раздел для старейшей ненецкой газеты «Няръяна Ӈэрм». В нем публикуются новости на ненецком языке.👇 ❄️Манзаяхананда нида нядаби Наталья Демьяновна Пырерко Нельмин’ Саляхана иле. Теда’ Малоземельской сельской советхана специалистӈэ тара. Муниципальной службам’ мале сидя ю’’ няхаромдэй по’ ямбан’ минреда. Сельсоветандо’ ӈэвахы — Николай Васильевич Марюев. Вадавнанда, сита нядабада няда ва’’лёй. Хусувэй тоенана серт’ ивъер’ сырӈа. Харто’ ямдо’ мэнена’’ хибяри’’ нямна манзеты’’: ханяна соявы, таняна таромда мэ’’ӈа. Тарця вада’’ Наталья Демьяновна’ нямна мэць серо’’ӈа’’. Пыда Ненэцие’ округхана соявы, нюдякоходанда Нельмин Саляхана вадёданавы, Пырерка’ не ню. Округханана’’ школамда ёльце’’махаданда Москва март’ ӈэдалавыць, таняна РУДН юридической факультетхана тоходана пядась. Таняд юристӈэ тарпыць, самляӈг по’’ ямбан’ тохолковамда ёльцесь, тикы’ пуд мяканда тэвыць. Университетхана тоходанаванда мальӈгана ида пили’’ харта янда нямна няркнасеты. Ханзер’’ ибедорӈась, тарем’ илаӈгананда хая. Тоходанава’ пода тенад ихинанда лэтамбида, теда’ ӈод’’ Москва маркана мэб’’нанда харта университетханда тюӈгасеты. — Тохолковани пуд округхани тодамзь, Няръяна маркана манзаядами нидамзь хо’’, сацьри’’ ӈод’’ нивакэдм’ харва’’. Ими хадри’’ таня’ нивакы ладар’’. 2002 похона мань Нельминан’ тодамзь. Таняна юристӈэ ханяна тараӈгосадм’? Ӈани’’ манзая’’ ӈод’’ яӈгуць. Ӈоб’’ мальӈгана си’’ми Лидия Михайловна Талеева хаӈась, тамальӈгана пыда колхозна’’ председательӈэ тарась. Тикахана пыда си’’ми саць нядась. Мале пон лаханакурӈанинзь, тикы’ пуд Выучейской’ нювм’ нюбета колхозан’ ӈэдабтась. Вадамда нивась мада’’. Хари’’ ӈэсыхынани манзаями ӈадимясь, — ваеравы пода ваде’’яда. Ӈацембой некоця бухгалтер-юристӈэ тарась. Сертабадада тянё нивысь ӈа’’, бухгалтерия’ падро сертабасеты, юрист’ манзаида минресеты, сельскохозяйственной предприятие’ серо тасламбасеты. — По’ ваерась си’’ми Михаил Семенович Талеев’ хаӈась, пыда тамальӈгана сельской советна’’ председательӈэ тарась, — Наталья вадамда нерня’ минреда. — Лидия Михайловна тарця серм’ мале теневавэдась, си’’ми нись табламбю’’. Серона’’ тоена миӈаць. Недбина’’ нинаць ня’’марпю’’, есьна’’ таӈэ ӈавар тамбасеты’’. Тикахана Лидия Михайловна мась: «Пыдар’ образованиер сава, хань’’, таняна пиртар». Тарем’ Малоземельской сельсовет’ специалистӈэ хаядамзь. Ӈэсыхы администрацияхана пыда ненэцие’’ е’’эмня ӈарка таром’ минре. Сельской советан’ турта’’ хонаркосеты’’, хибяхаван’ тарана падарм’ сертась тарасеты, хибяхавам’ ӈани’’ серка’’на нядась. Нельминхана синдтет юркад вата хибяри’’ иле’’, Наталья Демьяновна хусувэймдо’, нисянадо’, небянадо’, соя’’ма’ ялэдо’ тене. Тоенана серо мал’’ теневыда, нянда турта’’ вади сяхаӈгарт’ нисетыда хаебю’’. Янда тер’’ тарцям’ маниесь, саву’’цетыдо. Пудана’’ похо’’на’’ ил’ сава няю’ несэймдана. Ӈани’’ яха’’на тохолковамдо’ ёльцевы’’ ӈацембой’’ ненэця’’ турӈа’’, харто’ яханандо’ хаюрӈа’’. Едэй мяд’ тер’’ сояӈга’’, хэбядя ялэ мэ’’манзь ӈобт’ ма’’люрцеты’’. Теда’ Наталья Пырерко соя’’ма’ яхананда мэ. Сидя нюда. Не нюда тоходанавамда ёльце’’махаданда ӈани’ маркана иле, хасава нюкцяда школахана тоходана. Мякнанда, ӈэсыхынанда серода сава’’. Наталья Демьяновна ида таӈга. Ӈахакуд мале манзаяда иланда ӈарка серӈэ хэвы. Тюку поход Наталья Пырерко «Почётный работник органов местного самоуправления НАО» нювм’ минре. Ӈарка наградам’ округна’’ губернатор Юрий Бездудной’ ӈудахат ня’’мадась. Ихид минда вадина’’ Наталья Демьяновнан’ хэтыбина’’, ӈоб’’ ябдая, хусувэй ӈамгэда сава ӈэя. Автор: Юлия Талеева’ падвы

🤓 Ямальские педагоги пройдут стажировку в Белоруссии Кураторы психолого-педагогических классов пройдут обучение в октябре этого года. Департамент образования ЯНАО с Минским областным институтом развития образования заключил соглашение для обмена передовыми практиками. Фото: пресс-служба губернатора ЯНАО 💚 «Ямал-Медиа» | Поддержать нас бустом