26,3 тыс подписчиков
✒️ На нашем сайте запущен специальный раздел для газеты «Лух Авт». В нем публикуются новости на языке народов ханты.
❄️ Округева мосты леккар хот пуншса
Новый Уренгой вошан ун леккар хот пуншам порайн, округ кущаев «Вещкат юш» хуват яңхман щита па ус. Еӆпи, тамащ леккар хот нэмоӆты порайн округеван ант уӆӆыйс. Муш тайты шоши мув хоятӆува, яммаӆтыты па вошата яңхты мосас.
Хус щёрас квадратной метра ӆоват леккар хот, «Газпром» компания нётапса пиӆан кат таӆ сыс омасса. Пуншам юпийн, ӆув мохты рупитты питас.
Тамхатӆатан, округеван уӆты, няӆсот пеӆа ветъяң хоят ӆаварт муш эӆты лучевой терапия нётапса ӆаваӆӆат.
Леккар хот кат атэӆ рупитты ят тайӆ. Радиотерапевтической ятаӆан мушаң хоятата оӆты хольмаң пеӆа вет таха уӆ. Ӆаварт муш пувӆапса нёңхал пуңӆа пайтты ураңан хирургической отделение па пуншса. Там ятаӆ щёхар тыӆащан етшаптаӆа. Таӆ етшаты унты пуншӆа.
Па вошат па куртат эӆты веӆщи ёхаттыйн, пансионат ӆэщатман уӆ. Муш ӆэрапты па хоят тумтака верты ураңан, леккар хотаӆ арсыр яӆап щиран рупитты пормасатан тэкаптаман уӆ.
«Хоят уӆапса, щит мет воӆаң мойӆапса. Кашң ӆыӆ шув ӆэрые шавиман тайты мосаӆ. Щит ураңан, округеван, леккар рупата иса нётман тайӆэв. Ар юр щиеӆ понман уӆ. Хоят муш яммаӆтыман, леккарата туп рупитты мосаӆ. Муң хоты, нын пеӆайн эваӆман уӆӆув», — яӆап хот вантман, леккарат пиӆан уйтантымаӆан округ кущаев ястас.
Ямал мувева рупитты ёхаттыйн, леккарат нётапса охан маӆайт. Уӆты хот сохаптаты охан нётӆайт. Ӆащкам, хошам, яӆап леккар хотатан умащ рупитты.
Ӆаварт муш оӆаң сыс моштаты порайн, ёша ох пайтты па рахаӆ.
Хоят щимащ муш тайтыйн, 2021-мет таӆ эӆты мушаң хоят рутӆаӆ па вантӆайт. Хащам хуӆам таӆ сыс муш ӆэрапман, нийӆсот хус хоят ванттса.
Зоя Куртямова ханшам потар
1 минута
3 сентября 2024