У рамках рэспубліканскай акцыі «Кожная пятніца — роднае, сваё!» у Асінаўшчызне прайшло смачнае мерапрыемства, прысвечанае папулярызацыі прадукцыі мясцовых вытворцаў.
Напачатку ў краме «Асінка» ААТ «Спадчына» сваю прадукцыю прадставіла прадпрыемства «Смаргонскія малочныя прадукты». Падчас дэгустацыі пакупнікі маглі пакаштаваць тварог, смятану, сыры і сметанковы крэм «Мікс» з зелянінай.
Намеснік начальніка аддзела продажаў і маркетынгу прадпрыемства Надзея Владыка адзначыла, што такія сустрэчы дапамагаюць людзям лепш пазнаёміцца з прадукцыяй прадпрыемства.
— Нам вельмі прыемна частаваць людзей і расказваць пра тое, як вырабляюцца прадукты. Мы хочам, каб жыхары ведалі сваіх вытворцаў, ганарыліся і выбіралі роднае. За кожным вырабам стаіць праца вялікага калектыву, — падкрэсліла Надзея Тадэвушаўна.
Наступным пунктам у Асінаўшчызне стала крама «Родны кут», якая належыць Смаргонскаму філіялу Гродзенскага аблспажыўтаварыства. Тут таксама прайшла дэгустацыя прадукцыі мясцовых вытворцаў.
Дырэктар Смаргонскага філіяла аблспажыўтаварыства Ірына Галаватая з гонарам расказала пра прадукцыю ўласнай вытворчасці — грудзінку «Апетытную», каўбасы «Закуска з вёскі» і «Вясковая».
— Мы заўсёды імкнёмся працаваць для людзей і прапаноўваць якасную прадукцыю. Асабліва важна, што сёння ўсё больш пакупнікоў аддаюць перавагу мясцовым таварам. Гэта падтрымка нашых прадпрыемстваў і нашых работнікаў, — адзначыла Ірына Іванаўна.
Інжынер-тэхнолаг Смаргонскага філіяла Астравецкага ўчастка хлебазавода Вольга Бразевіч расказала пра хлебабулачныя вырабы, якія былі прадстаўлены пакупнікам.
— Мы стараемся захоўваць традыцыі і разам з тым прапаноўваць пакупнікам нешта новае. Сёння можна было пакаштаваць багет «Сталічны», хлеб «Азёрны» і «Раздолле», рулет «Макоўнік», батон здобны «Верасок» і іншыя вырабы. Вельмі прыемна бачыць, што людзі цікавяцца і высока ацэньваюць нашу прадукцыю, — сказала Вольга Іванаўна.
У мерапрыемстве таксама прыняла ўдзел галоўны спецыяліст упраўлення эканомікі, гандлю і паслуг райвыканкама Аксана Шытко.
— Такія акцыі дапамагаюць не толькі пазнаёміць людзей з прадукцыяй мясцовых вытворцаў, але і падкрэсліваюць важнасць падтрымкі беларускага каларыту. Калі мы выбіраем сваё, мы падтрымліваем развіццё прадпрыемстваў, эканоміку раёна і краіны ў цэлым, — падкрэсліла Аксана Анатольеўна.
Наведвальнікі з задавальненнем дэгуставалі прадукцыю, дзяліліся ўражаннямі і адзначалі высокую якасць беларускіх тавараў.
Ларыса ТАТАРЫНАВА
Фота аўтара