Одно из чудес, которым прославилась икона «Взыскание погибших», относится к середине XVII века. Калужский крестьянин, сбившись с пути в зимнюю вьюгу, уже не чаял остаться в живых и взмолился, обещав, что в случае спасения от погибели, подарит приходскому храму список с иконы Божией Матери. Тотчас же его сани оказались у соседней деревни, и жизнь крестьянина была спасена. С тех пор к этой иконе прибегают люди, которые оказались перед лицом смертельной опасности.
Акафист Пресвятой Богородице пред иконой «Взыскание погибших»
Кондак 1
Взбра́нной Воево́де победи́тельная, я́ко изба́вльшеся от ве́чныя сме́рти благода́тию от Тебе́ ро́ждшагося Христа́ Бо́га на́шего и Твои́м Ма́терним пред Ним хода́тайством, благода́рственная воспису́ем Ти, раби́ Твои́, но я́ко иму́щая держа́ву непобеди́мую, от вся́ких нас бед и скорбных обстоя́ний свободи́, зову́щих:
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Икос 1
А́нгел предста́тель послан бысть с Небесе́ рещи́ Богоро́дице: ра́дуйся, Благослове́нная в жена́х, предрече́нная Ма́ти Христа́, Сы́на Бо́жия. Те́мже и мы, грехми́ обремене́ннии, наде́жду спасе́ния в Тебе́ улучи́вше, уми́льно взыва́ем Ти:
Ра́дуйся, Бо́жие ко гре́шным благоволе́ние;
ра́дуйся, ка́ющихся пред Го́сподем Бо́гом кре́пкое заступле́ние.
Ра́дуйся, па́дшаго Ада́ма воззва́ние;
ра́дуйся, слез Е́виных избавле́ние.
Ра́дуйся, грехо́вную отъе́млющая скве́рну;
ра́дуйся, ба́не, омыва́ющая со́весть.
Ра́дуйся, ро́ждшая Изба́вителя, беззако́ния на́ша ми́лостиво очища́ющаго;
ра́дуйся, всечу́дное всех к Бо́гу примире́ние.
Ра́дуйся, мо́сте, вои́стинну преводя́й нас от сме́рти к животу́;
ра́дуйся, мир от пото́па грехо́внаго спа́сшая.
Ра́дуйся, ле́ствице небе́сная, Е́юже Госпо́дь к нам сни́де;
ра́дуйся, вина́ всех обоже́ния.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 2
Ви́дяще то́ки чуде́с, излива́емыя от святы́я Твоея́ ико́ны, Блага́я Богороди́тельнице, и разуме́юще, я́ко Ты еси́ моля́щихся Блага́я Помо́щница, оби́димых Засту́пница, ненаде́ющихся наде́жда, печа́льных утеше́ние, поги́бших Взыска́ние, а́лчущих Корми́тельница, наги́х одея́ние, де́вственных целому́дрие, стра́нных Наста́вница, тружда́ющихся по́мощь, слепы́х прозре́ние, глухи́х благослы́шание, больны́х исцеле́ние, благода́рственне вопие́м о Тебе́ Бо́гу: Аллилу́иа.
Икос 2
Та́йну Твоего́, Богоро́дице, заступле́ния люде́й, в ско́рби погиба́ющих, уразуме́ти хотя́ще, к Тебе́ прибега́ем, о Ма́ти и Де́во. Ты же, я́ко Блага́я, научи́ ны разуме́ти в защище́нии Блага́го Сы́на Твоего́ милосе́рдое промышле́ние о спасе́нии душ на́ших и очище́ние мно́гих согреше́ний, да взыва́ем Ти ра́достно:
Ра́дуйся, обурева́емых ти́хое приста́нище;
ра́дуйся, сумня́щихся изве́стное утвержде́ние.
Ра́дуйся, Еди́на Ма́ти милосе́рдия;
ра́дуйся, ско́рая Помо́щнице су́щим в беда́х и напа́стех.
Ра́дуйся, скорбьми́ грехи́ на́ша очища́ющая;
ра́дуйся, печа́лию на́ша не́мощи душе́вныя врачу́ющая.
Ра́дуйся, суе́тныя ра́дости презира́ти нас науча́ющая;
ра́дуйся, к вы́шнему ми́ру ум наш возводя́щая.
Ра́дуйся, от любве́ земны́я к Небе́сней Бо́жией любви́ нас привлека́ющая;
ра́дуйся, в са́мых страда́ниих на́ших утеше́ние и благода́тную жизнь нам подаю́щая.
Ра́дуйся, обетова́ние благ ве́чных;
ра́дуйся, Хода́таице ве́чныя ра́дости.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 3
Си́лою свы́ше укрепи́ мя, Блага́я Влады́чице, неду́гующа те́лом и душе́ю, и посеще́ния Твоего́ сподо́би и промышле́ния, мрак уны́ния и ско́рби, облежа́щий мя, отгоня́ющи, да, спаса́емый Тобо́ю, при́сно воспою́ Бо́гу: Аллилу́иа.
Икос 3
Иму́щи бога́тство милосе́рдия неизрече́нное, всем скорбя́щим ру́ку по́мощи простира́еши, неду́ги врачу́ющи, стра́сти исцеля́ющи. Не пре́зри и мене́, Блага́я Влады́чице, на одре́ не́мощи моея́ низлежа́ща и вопию́ща Ти:
Ра́дуйся, ми́лости сокро́вище многоце́нное;
ра́дуйся, отча́янных еди́на наде́ждо.
Ра́дуйся, те́ла моего́ врачева́ние;
ра́дуйся, души́ моея́ спасе́ние.
Ра́дуйся, тве́рдая кре́посте немощны́х;
ра́дуйся, изнемога́ющих Засту́пнице и укрепле́ние.
Ра́дуйся, гнев Бо́жий Твои́м моле́нием ско́ро утоля́ющая;
ра́дуйся, стра́сти на́ша си́лою моли́тв Твои́х укроща́ющая.
Ра́дуйся, слепы́х зре́ние, глухи́х слы́шание;
ра́дуйся, хромы́х хожде́ние, немы́х глаго́лание.
Ра́дуйся, боля́щих благонаде́жное посеще́ние;
ра́дуйся, я́ко Тобо́ю, по ме́ре ве́ры, подаю́тся благода́тная исцеле́ния всем немощству́ющим.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 4
Бу́ря мно́гих бед и напа́стей обы́дет мя, и волне́ния уже́ не терплю́. Ты же, я́ко Ми́лостивая Ма́ти Спа́са моего́ и Бо́га, воздви́гни ру́це к Сы́ну Твоему́, моля́щи Его́, да при́зрит на лю́тую ско́рбь се́рдца моего́ и воздви́гнет мя из пучи́ны отча́яния, вопию́щаго Ему́: Аллилу́иа.
Икос 4
Слы́шащи, Пресвята́я Де́во и Ма́ти, Симео́на пра́веднаго прорече́ние: «Тебе́ же Само́й ду́шу пройде́т ору́жие», — слага́ла еси́ в се́рдце Твое́м вся глаго́лы сия́, разумева́ющи, я́ко ра́дость ма́терняго се́рдца о ча́дех мно́гих печа́лей в ми́ре сем прича́стна. Те́мже, я́ко искуше́нней по вся́ческим и спострада́ти ма́терней ско́рби могу́щей, взыва́ем Ти:
Ра́дуйся, ра́дость ми́ру, Христа́ Спаси́теля, ро́ждшая;
ра́дуйся, мир от скорбе́й избавля́ющая.
Ра́дуйся, поноше́ние Сы́на Твоего́ терпе́вшая;
ра́дуйся, страда́нием Его́ спострада́вшая.
Ра́дуйся, скорбны́х ма́терей утеше́ние;
ра́дуйся, чад их благода́тное охране́ние.
Ра́дуйся, в беда́х ско́рое нам заступле́ние;
ра́дуйся, заблу́ждших исправле́ние.
Ра́дуйся, младе́нцев пита́ние;
ра́дуйся, ю́ных наставле́ние.
Ра́дуйся, Ма́ти сиротству́ющих;
ра́дуйся, вдов заступле́ние.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 5
Богото́чную Кровь Сы́на Твоего́ на Кресте́ за спасе́ние на́ше излива́ему зря́щи, я́ко Раба́ Госпо́дня, повину́ющися во́ли Отца́, И́же на Небесе́х, нам о́браз злострада́ния и терпе́ния яви́ла еси́, да и мы, в пещи́ искуше́ний и бед су́щии, вопие́м смире́нно Бо́гу: Аллилу́иа.
Икос 5
Ви́дя Тя Сын Твой и Бог, при Кресте́ стоя́щую с возлю́бленным ученико́м и се́рдцем Ему́ сраспина́ющуюся, глаго́ла: «Же́но, се сын Твой», и ученику́: «Се, Ма́ти твоя́», — всыновля́я Тебе́ вся ве́рующия в Него́. Мы же, я́ко о́бщницы ско́рби и страда́ний Сы́на Твоего́, име́юще в Тебе́ Благу́ю Ма́терь, на Тя все упова́ние в ско́рби возлага́юще, вопие́м Ти:
Ра́дуйся, Ма́ти ро́да христиа́нскаго;
ра́дуйся, усынови́вшая нас при Кресте́ Сы́на Твоего́.
Ра́дуйся, Бо́га с челове́ки соедини́вшая;
ра́дуйся, ве́рных Го́сподеви сочета́вшая.
Ра́дуйся, А́гнице, ро́ждшая А́гнца, взе́мшаго грехи́ ми́ра;
ра́дуйся, Ча́ше, че́рплющая нам ра́дость от Исто́чника безсме́ртия.
Ра́дуйся, Спору́чнице спасе́ния гре́шных;
ра́дуйся, Взыска́ние поги́бших.
Ра́дуйся, неча́янная гре́шных Ра́досте;
ра́дуйся, па́дших возста́ние.
Ра́дуйся, всех скорбя́щих Цели́тельнице;
ра́дуйся, всех бе́дствующих Помо́щнице.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 6
Пропове́дуют Твою́ по́мощь, Влады́чице, вси концы́ земли́, и́бо мно́гих изба́вила еси́ от го́рьких бед, от тя́жких неду́гов и отча́яния духо́внаго. Те́мже, благода́рным се́рдцем Тя велича́юще, пое́м Бо́гу: Аллилу́иа.
Икос 6
Возсия́ нам свет спасе́ния во тьме поги́бели на́шея, и Ты, Всеблага́я, предста́тельством Твои́м наставля́еши нас к све́ту ве́чныя жи́зни. Услы́ши у́бо глас мо́льников Твои́х, вопию́щих Ти си́це:
Ра́дуйся, заблу́ждших на путь и́стины наставля́ющая;
ра́дуйся, свет ве́ры во Христа́ в сердца́ на́ша возжига́ющая.
Ра́дуйся, от е́ресей и раско́лов нас сохраня́ющая;
ра́дуйся, в ве́ре Правосла́вной нас утвержда́ющая.
Ра́дуйся, науча́ющая нас во всем упова́ти на Бо́га;
ра́дуйся, смире́ние и терпе́ние нам да́рующая.
Ра́дуйся, отча́янным две́ри милосе́рдия Бо́жия открыва́ющая;
ра́дуйся, ка́ющихся гре́шников Сы́ну Твоему́ примиря́ющая.
Ра́дуйся, христиа́нская кончи́на жи́зни на́шея;
ра́дуйся, Стра́шнаго Суда́ наде́ждо и заступле́ние.
Ра́дуйся, Врата́, вводя́щая в рай;
ра́дуйся, ве́чнаго блаже́нства Хода́таице.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 7
Хотя́щу всеми́лостивому Бо́гу яви́ти нам, гре́шным, Свое́ неисче́тное человеколю́бие, даде́ нам, Влады́чице, Тя в по́мощь и покро́в. Те́мже благода́рне вопие́м Бо́гу: Аллилу́иа.
Икос 7
Ди́вная и пресла́вная чудеса́ Тобо́ю, Богома́ти, содева́ются: ве́рою притека́ющим ко ико́не Твое́й святе́й подае́ши исцеле́ния, скорбе́й избавле́ние и отча́янных оживле́ние. Сего́ ра́ди взыва́ем Ти:
Ра́дуйся, ско́рбное посеще́ние Твое́ нам посыла́ющая;
ра́дуйся, благода́тию Твое́ю нас осеня́ющая.
Ра́дуйся, ико́ною Твое́ю чудеса́ источа́ющая;
ра́дуйся, от тлетво́рных страсте́й нас исцеля́ющая.
Ра́дуйся, неду́ги душе́вныя и теле́сныя врачующая;
ра́дуйся, ду́ши на́ша любо́вию Твое́ю согрева́ющая.
Ра́дуйся, я́ко Тобо́ю наде́жда спасе́ния нас окриля́ет;
ра́дуйся, я́ко Тобо́ю ве́ра и любо́вь в сердца́х на́ших возраста́ют.
Ра́дуйся, Ака́фистов сла́дкое пение от нас прие́млющая;
ра́дуйся, моли́твы на́ша к Сы́ну Твоему́ вознося́щая.
Ра́дуйся, Всеблага́я Помо́щнице на́ша;
ра́дуй, Ско́рая в беда́х Засту́пнице.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 8
Стра́нницы и прише́льцы есмы́ на земли́ се́й, по глаго́лу апо́стола, и в ско́рбем житие́ на́ше. Ты же, Влады́чице, я́ко Блага́я, наста́ви ны в приста́нище небе́сное, да спаса́еми Тобо́ю, пое́м Бо́гу: Аллилу́иа.
Икос 8
Весь мир христиа́нский Тя, Пречи́стая, сла́вит, вся́кими беда́ми обурева́емый, Твоего́ предста́тельства про́сит, Твоея́ по́мощи тре́бует в ско́рбех. Найпа́че же мы, гре́шнии и погиба́ющии, на Тя еди́ну наде́жду возлага́ем и уми́льно зове́м:
Ра́дуйся, путеводи́тельнице на́ша ко Го́споду;
ра́дуйся, ско́рбных и печа́льных утеше́ние.
Ра́дуйся, озло́бленных и уничиже́нных призре́ние;
ра́дуйся, си́рых и безпо́мощных покрови́тельнице.
Ра́дуйся, неду́гующих цели́тельнице;
ра́дуйся, уныва́ющих ободре́ние.
Ра́дуйся, бра́ней ми́ра утише́ние;
ра́дуйся, го́рдых ми́ра сего́ посрамле́ние.
Ра́дуйся, о ка́ющихся гре́шников Сы́на Твоего́ умоля́ющая;
ра́дуйся, всем и́щущим спасе́ния по́мощь да́рующая.
Ра́дуйся, кре́пкое на враги́ неви́димыя ополче́ние;
ра́дуйся, в час сме́ртный нам Засту́пнице.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 9
Все естество́ А́нгельское пе́сньми Тя, Богома́ти, ублажа́ет, мы же земноро́днии, благода́рственная Тебе́ принося́ще о ми́лостех Твои́х, с любо́вию вопие́м Бо́гу: Аллилу́иа.
Икос 9
Вети́и многовеща́ннии не мо́гут по достоя́нию воспети́ Тя, Пресвята́я Де́во, и чудеса́ Твоя́ исчести́, от ико́ны Твоея́ «Взыска́ние поги́бших» истека́ющая. Те́мже, недоуме́юще восхвали́ти Тя по достоя́нию, смире́нно прино́сим Ти сицева́я:
Ра́дуйся, Ра́досте, Ея́же ра́дости николи́же коне́ц;
ра́дуйся, Сла́досте, вся́кую го́ресть и печа́ль на́шу утоля́ющая.
Ра́дуйся, све́том небе́сным ду́ши ве́рных озаря́ющая;
ра́дуйся, грехо́вную тьму от нас отгоня́ющая.
Ра́дуйся, отча́янным на́дежду спасе́ния подаю́щая;
ра́дуйся, малоду́шных ободря́ющая.
Ра́дуйся, лени́вых к доброде́ланию возставля́ющая;
ра́дуйся, всех в ско́рбех су́щих утеша́ющая.
Ра́дуйся, оби́димых Засту́пнице;
ра́дуйся, гони́мых Прибе́жище.
Ра́дуйся, погиба́ющих Взыска́ние;
ра́дуйся, всех скорбя́щих Ра́досте.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 10
Спасти́ хотя́ мно́гия от поги́бели, дарова́ нам Госпо́дь Тя, Ма́терь Свою́, в по́мощь и покро́в. Те́мже припа́дающе к ико́не Твое́й чудотво́рней, благода́рно вопие́м Бо́гу: Аллилу́иа.
Икос 10
Стена́ еси́ де́вам, Богоро́дице Де́во, и всем к Тебе́ прибега́ющим. Моли́ у́бо Сы́на Твоего́ и Бо́га на́шего, дарова́ти нам проще́ние прегреше́ний и изба́вити нас от поги́бели ве́чныя, да с любо́вию зове́м Ти:
Ра́дуйся, на́ше к Бо́гу дерзнове́ние;
ра́дуйся, на́ше упова́ние и заступле́ние.
Ра́дуйся, Боже́ственныя сла́вы жили́ще;
ра́дуйся, Ца́рствия Небе́снаго клю́ч.
Ра́дуйся, А́дова упраздне́ние;
ра́дуйся, сме́рти умерщвле́ние.
Ра́дуйся, жи́зни ве́чныя дарова́ние;
ра́дуйся, Пода́тельнице ве́чных благ.
Ра́дуйся, Ада́мово воззва́ние;
ра́дуйся, Е́вино избавле́ние.
Ра́дуйся, всех проро́ков исполне́ние;
ра́дуйся, всех апо́столов похвало́.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 11
Пе́ние на́ше, а́ще бы и безчи́сленное было́, не довле́ло бы к досто́йному прославле́нию ми́лостей Твои́х, Влады́чице. Мы же, недоуме́юще воспе́ти Тя по достоя́нию, оба́че, упова́юще на благоутро́бие Твое́, со стра́хом и любо́вию припа́даем и, велича́юще чудеса́ Твоя́, пое́м Бо́гу: Аллилу́иа.
Икос 11
Светоприе́мная свеща́, во тьме грехо́вней су́щим свет подаю́щи, яви́лася еси́, Богоро́дице, указу́ющи нам путь к спасе́нию. Те́мже просвеща́еми Тобо́ю, благода́рственно вопие́м Ти:
Ра́дуйся, просвеще́ние умо́в на́ших;
ра́дуйся, очище́ние серде́ц на́ших.
Ра́дуйся, возсия́ние све́та Боже́ственнаго;
ра́дуйся, озаре́ние благода́тию Свята́го Ду́ха.
Ра́дуйся, наставля́ющая нас во тьме заблужде́ний;
ра́дуйся, показу́ющая нам путь пра́вый.
Ра́дуйся, в ве́ре нас утвержда́ющая;
ра́дуйся, наде́ждою нас окриля́ющая.
Ра́дуйся, любо́вию нас согрева́ющая;
ра́дуйся, в ско́рбех нас утеша́ющая.
Ра́дуйся, от отча́яния нас избавля́ющая;
ра́дуйся, в терпе́нии нас укрепля́ющая.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 12
Благода́ть пода́ти нам хотя́ от ико́ны Твоея́, «Взыска́ние поги́бших» имену́емыя, дарова́ла еси́ нам, Влады́чице, неисче́рпный исто́чник чуде́с, да, притека́юще к ней с ве́рою, исцеле́ния неду́гов, в ско́рбех утеше́ние и от поги́бели избавле́ние получа́юще, благода́рно вопие́м Бо́гу: Аллилу́иа.
Икос 12
Пою́ще Твоя́ чудеса́, сла́вим Тя, вси от ве́ка погиба́ющих ско́рую Помо́щницу, Засту́пницу и Спаси́тельницу. Ве́руем бо, я́ко не преста́еши и ны́не, Влады́чице, притека́ющим к Тебе́ с ве́рою подава́ти по́мощь Твою́. Сего́ ра́ди, благогове́йно пред ико́ною Твое́ю преклоня́юще коле́на, со слеза́ми вопие́м Ти:
Ра́дуйся, ско́рбных и печа́льных утеше́ние;
ра́дуйся, от напа́стей и бед избавле́ние.
Ра́дуйся, алчущих Корми́тельнице;
ра́дуйся, наги́х одея́ние.
Ра́дуйся, боля́щих исцеле́ние;
ра́дуйся, гре́шных спасе́ние.
Ра́дуйся, погиба́ющих Взыска́ние;
ра́дуйся, всех скорбя́щих Ра́досте.
Ра́дуйся, на́ше к Бо́гу дерзнове́ние;
ра́дуйся, на́ша наде́ждо и заступле́ние.
Ра́дуйся, ны́не и при́сно и во ве́ки веко́в с на́ми пребыва́ющая;
ра́дуйся, всех концо́в земли́ ско́рая Помо́щнице.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 13
О, Всепе́тая Ма́ти, Цари́це Небе́сная и земли́! Приими́ ны́не ма́лое сие́ моле́ние на́ше и, я́ко Блага́я и Ми́лостивая, при́зри на ны, гре́шныя, погиба́ющия в беда́х и ско́рбех, умоли́ Сы́на Твоего́, Христа́ Бо́га на́шего, изба́вити нас от поги́бели ве́чныя, от вся́ких бед и напа́стей и спасти́ ду́ши на́ша, да с любо́вию вопие́м Бо́гу: Аллилу́иа.
(Этот кондак читается трижды)
Икос 1
А́нгел предста́тель послан бысть с Небесе́ рещи́ Богоро́дице: ра́дуйся, Благослове́нная в жена́х, предрече́нная Ма́ти Христа́, Сы́на Бо́жия. Те́мже и мы, грехми́ обремене́ннии, наде́жду спасе́ния в Тебе́ улучи́вше, уми́льно взыва́ем Ти:
Ра́дуйся, Бо́жие ко гре́шным благоволе́ние;
ра́дуйся, ка́ющихся пред Го́сподем Бо́гом кре́пкое заступле́ние.
Ра́дуйся, па́дшаго Ада́ма воззва́ние;
ра́дуйся, слез Е́виных избавле́ние.
Ра́дуйся, грехо́вную отъе́млющая скве́рну;
ра́дуйся, ба́не, омыва́ющая со́весть.
Ра́дуйся, ро́ждшая Изба́вителя, беззако́ния на́ша ми́лостиво очища́ющаго;
ра́дуйся, всечу́дное всех к Бо́гу примире́ние.
Ра́дуйся, мо́сте, вои́стинну преводя́й нас от сме́рти к животу́;
ра́дуйся, мир от пото́па грехо́внаго спа́сшая.
Ра́дуйся, ле́ствице небе́сная, Е́юже Госпо́дь к нам сни́де;
ра́дуйся, вина́ всех обоже́ния.
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 1
Взбра́нной Воево́де победи́тельная, я́ко изба́вльшеся от ве́чныя сме́рти благода́тию от Тебе́ ро́ждшагося Христа́ Бо́га на́шего и Твои́м Ма́терним пред Ним хода́тайством, благода́рственная воспису́ем Ти, раби́ Твои́, но я́ко иму́щая держа́ву непобеди́мую, от вся́ких нас бед и скорбных обстоя́ний свободи́, зову́щих:
Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Молитва ко Пресвятой Богородице пред иконой Ея «Взыскание погибших»
О, Пресвята́я и Преблагослове́нная Де́во, Влады́чице Богоро́дице, Спору́чнице гре́шных и Взыска́ние поги́бающих! При́зри ми́лостивным Твои́м о́ком на нас, предстоя́щих пред свято́ю ико́ною Твое́ю и со умиле́нием моля́щихся Тебе́: воздви́гни нас из глубины́ грехо́вныя, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы бо ины́я по́мощи, не и́мамы ины́я наде́жды, ра́зве Тебе́, Влады́чице. Ты ве́си вся не́мощи на́ша и согреше́ния, к Тебе́ прибега́ем и вопие́м: не оста́ви нас Твое́ю небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея, изба́ви нас от скорбе́й, бед и боле́зней, от напра́сныя сме́рти, а́да и ве́чныя му́ки. Ты бо, Цари́це и Влады́чице, еси́ ско́рая Помо́щница и Засту́пница всем притека́ющим к Тебе́ и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц жи́зни на́шея, ми́рен и непосты́ден, и сподо́би нас Твои́м хода́тайством всели́тися в Оби́телех Небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Чудотворная икона «Всех скорбящих Радость» находится в храме на ул. Ордынка рядом с метро Третьяковская. В 1688 году сестра Патриарха Московского и всея Руси Иоакима, Евфимия, долго страдавшая неизлечимой болезнью, однажды услышала голос, призывающий ее пойти помолиться перед образом Божией Матери «Всех скорбящих Радость» на Ордынку и заказать водосвятный молебен. Евфимия выполнила указание и исцелилась.
