Միացյալ Նահանգների փոխնախագահ Ջեյ Դի Վենսը Միլանում ձմեռային Օլիմպիական խաղերի բացմանը մասնակցելուց հետո կժամանի Հայաստան ու Ադրբեջան, հայտնում է Associated Press գործակալությունը։
Վենսն է գլխավորում ձմեռային Օլիմպիական խաղերի բացման արարողությանն ԱՄՆ պատվիրակությունը, որի կազմում են նաև Պետքարտուղար Մարկո Ռուբիոն և Իտալիայում ԱՄՆ դեսպան Թիլման Ֆերտիտտան։
«Իտալիայից Վենսը կուղևորվի Հայաստան և Ադրբեջան, որտեղ Թրամփը նրան հանձնարարել է զարգացնել համաձայնագիրը, որը նպատակ ունի վերջ դնելու երկու երկրների միջև չորս տասնամյակ տևած հակամարտությանը»,- նշում է պարբերականը:
Օլիմպիական խաղերի բացումը տեղի է ունենալու փետրվարի 6-ին։ Վենսի այցի օրը պաշտոնապես չի հաղորդվել:
ԱՄՆ նախագահ Դոնալդ Թրամփը հունվարի 24-ին հայտնել էր, որ Վենսը փետրվարին կայցելի Հայաստան և Ադրբեջան՝ խաղաղության նախաձեռնություններն ամրապնդելու և TRIPP («Թրամփի ուղի հանուն միջազգային խաղաղության և բարգավաճման») նախագիծն առաջ մղելու համար։
Նորություններին հետևեք մեր կայքում, ինչպես նաև Telegram-ում և YouTube-ում