Иң яҡшы белгестәр билдәләнде
Конкурста илебеҙҙең төрлө мөйөштәренән 880 персонал буйынса белгес ҡатнашты
Өфөлә “Кадрҙар” милли проектына ярашлы (нац.проект "Кадры"), Башҡортостан тармаҡ-ара хеҙмәтте, экологияны һәм производствола хәүефһеҙлекте һаҡлау институтында “Персонал буйынса иң яҡшы белгес-2026” төбәк ара конкурсы үткәрелде.
Дистанцион форматта үткән конкурста илебеҙҙең төрлө мөйөштәренән 880 персонал буйынса белгес ҡатнашты.
60 минут эсендә һәр конкурсант профессиональ стандарт буйынса төҙөлгән 35 һорауға яуап бирергә тейеш ине. Һөҙөмтәлә барыһынан да тиҙерәк һәм дөрөҫөрәк яуаптарҙы Һамар ҡалаһынан “Автомобиль системалары һәм технологиялар” ойошмаһының кадрҙар бүлеге начальнигы Светлана Сидорова бирҙе. Конкурс призерҙары дипломдар һәм ҡиммәтле приздар аласаҡ. Дипломдарҙы шулай уҡ иҡтисад тармаҡтары буйынса иң яҡшы белгестәр аласаҡ. Ҡалған конкурсанттарға электрон сертификаттар тапшырыласаҡ.
Көслө иҡтисадты үҫтереү, квалификациялы хеҙмәткәрҙәр менән тәьмин итеү өсөн яңы “Кадрҙар” милли проектының индерелеүе байтаҡ көнүҙәк мәсьәләләрҙе хәл итәсәк. Йыл һайын уға ярашлы белгестәргә ихтыяж өйрәнеләсәк, алдан күҙаллау, вуздарҙа һәм колледждарҙа бюджет урындарын билдәләү өсөн төплө нигеҙ барлыҡҡа киләсәк. Әле илдә юғары квалификациялы кадрҙарға ихтыяж 1,5 миллион кеше тәшкил итә. Айырыуса төҙөлөш, транспорт, торлаҡ-коммуналь хужалыҡ өлкәләре ҡытлыҡ кисерә. Тап ошо проект профессиональ әҙерлекте иҡтисад, фән һәм технологиялар үҫешенә, иҡтисад ихтыяжына ярашлы тәьмин итергә тейеш. ”Кадрҙар” – белем биреү учреждениелары, компаниялары һәм дәүләт эшмәкәрлеген берләштерәсәк, студенттарҙың уҡыуын һәм практикаһын, уҡыусыларҙың профессиональ йүнәлешен көсәйтәсәк. Рәсәй Президенты Владимир Путин ҡарары буйынса яңы милли проект 2025 йылдың 1 ғинуарынан тормошҡа ашырыла.
Фото: Ғаилә, хеҙмәт һәм халыҡты социаль яҡлау министрлығы.