Андрей Назаров һәм Хөкүмәт ағзалары эшҡыуарҙарҙың һорауына яуап бирҙе

Диалог профилле ведомстволар етәкселәре менән бергә үтте һәм хөкүмәттең республика муниципалитеттарына даими эш сәфәрҙәренең дауамы булды. Осрашыу башында Андрей Назаров, бындай сараларҙың төп бурысы - власть менән бизнес араһында ғәҙел һәм туранан-тура аралашыу булдырыу, тип һыҙыҡ өҫтөнә алды: -Беҙ Нефтекама бизнес-берләшмәһенең киләсәге тураһында етди һөйләшеү өсөн йыйылдыҡ. Эшҡыуарҙарға яңы кимәлгә сығырға, һөҙөмтәле үҙ-ара эш итеүҙе көйләргә һәм ҡала үҫеше өсөн эшләгән башланғыстарға нисек ярҙам итергә кәрәклеген аңлау мөһим, - тип билдәләне Премьер-министр. Ул республика Башлығы Радий Хәбиров башланғысы менән «ЦУР Бизнес» экосистемаһын булдырыуға айырыуса иғтибар бүлде. Быйыл ғына ошондай 10 осрашыу үтте. Нефтекама - Башҡортостандың иң динамик иҡтисади үҙәктәренең береһе. Уҙған йыл йомғаҡтары буйынса ҡала иҡтисадына инвестициялар күләме 9 миллиард һумдан ашып китте, 29,5% үҫеш күрһәтте. 2019 йылда булдырылған «Нефтекама» йылдам үҫеш биләмәһе төп үҫеш ҡоралы булып ҡала. Ҡалала 5 меңгә яҡын бәләкәй һәм урта эшҡыуарлыҡ субъекты әүҙем эшләй, уларҙың һаны йылына 5,2 процентҡа артҡан. Эшҡыуарҙарҙың иң ҙур өлөшө сауҙа, төҙөлөш, эшкәртеү производстволарында, транспортта һәм һаҡлауҙа мәшғүл. Осрашыуҙа 250-гә яҡын эшҡыуар ҡатнашты. Улар ер участкалары һатып алыу, һалым преференциялары, ижади индустрияларға ярҙам итеү һәм ҡаланың эшлекле климатына туранан-тура йоғонто яһаусы башҡа темаларҙы тикшерҙе. Йәнле диалог форматы бизнесҡа үҙ тәҡдимдәрен һәм проблемалы нөктәләрен әйтергә, ә төбәк ведомстволарына уларҙы эшкә алырға мөмкинлек бирҙе. Мәҫәлән, «Малыш» яуаплылығы сикләнгән йәмғиәте һәм ойоҡ-ойоҡбаш фабрикаһы директоры Юлия Суходольская еңел сәнәғәт предприятиелары өсөн республика субсидиялау программаһының компанияға етештереү күләмен арттырырға һәм билдәле маркетплейстың ойоҡ изделиелары һатыусыларҙың топ өсөнә инергә ярҙам итеүе хаҡында һөйләне. Эшҡыуар киләһе йылда программа эшләйме-юҡмы икәнлеге менән ҡыҙыҡһынды. Башҡортостандың сәнәғәт, энергетика һәм инновациялар министрының беренсе урынбаҫары Тимур Герасимов һүҙҙәренсә, еңел сәнәғәткә ярҙам итеү буйынса республика программаһы компанияларҙың баҙарҙағы позицияларын ярайһы уҡ яҡшыртты, уларҙың үҫешенә йоғонто яһаны: - 2021 йылда төбәк Башлығы инициативаһы менән башланған программа 2026 йылға тиклем дауам ителәсәк. Республикала был тармаҡ өсөн 36 миллион һум күләмендә субсидиялар планлаштырылған. Программала ҡатнашыуға ғариза биреп, эшҡыуарҙар сеймал һатып алыуға аҡсаның бер өлөшөн ҡаплай ала. Илебеҙҙә етештерелгән ҡорамалдар һатып алыуға субсидияларҙы оҙайтыуға килгәндә, был мәсьәләне федераль Сауҙа министрлығы менән тикшерәбеҙ. Электр ҡалҡан ҡорамалдары етештереү менән шөғөлләнгән “220 вольт НПП” етәксеһе Елена Гагарина пландары менән уртаҡлашты: компания киңәйергә йыйына, ә бының өсөн дәүләт милкендәге эргә-тирәләге ерҙәр иҫәбенә участка майҙанын арттырырға кәрәк. Уның мәсьәләһе эшҡыуарҙар өсөн был процесты еңеләйткән һәм оптималләштергән ер участкаларын һәм дәүләт ярҙамы механизмдарын ҡайтанан бүлеү процедураһына ҡағыла. - Әгәр һеҙ республика Башлығының инвестиция сәғәте аша ошо мәсьәләне хәл итеү юлы менән барһағыҙ, был һеҙҙең проектты әҙерләү һәм оҙатыу мөмкинлеген бирә, ә проект өйрәнеүҙе талап итә. Бындай киңәйтеүҙең миҫалдары бар. Муниципалитет кимәлендә эшҡыуарлыҡ сәғәте лә ярҙам итә ала, - тип һыҙыҡ өҫтөнә алды Премьер-министр. - Ҡуртымға алынған торлаҡ - бик мөһим йүнәлеш, - тип һорауҙың беренсе өлөшөнә яуап бирҙе Андрей Назаров. - Бөтәһе лә фатир һатып ала алмай, ҡуртымға алынған йорттар белгестәргә торлаҡҡа аҡыллы хаҡ менән түләргә мөмкинлек бирә. Бындай программа бар, әммә ул әкрен үҫешә, ҡыҙғанысҡа ҡаршы. Миҫал өсөн - беҙҙең Өфө моторҙар эшләү производство берекмәһе ул партнер менән Өфөлә ошондай йорт төҙөнө. Был яҡшы миҫал, дөрөҫ йүнәлеш. Хәл яҡшырған һайын уны киңәйтәсәкбеҙ. Башҡортостандың мәғариф министры Илдар Мәүлетбирҙин республикала эшсе кадрҙар етешмәүен ҡаплау өсөн нимә эшләнеүе хаҡында һөйләне: - Ағымдағы йылдың 1 сентябренән беҙ ошондай аҙымға барҙыҡ. Урта махсус уҡыу йорттарында һәм колледждарҙа контроль һандарҙы арттырыу өсөн республика бюджетынан 150 миллион һум самаһы аҡса бүлдек. Ошондай 12 мең урынға ике мең өҫтәнек, шул иҫәптән Нефтекамала. Машиналар эшләү өсөн кадрҙар кәрәк, был йүнәлеш буйынса ла өҫтәйбеҙ. Креатив индустриялар өсөн махсус кластерҙар йәки технопарктар булдырыу планлаштырыламы, тип ҡыҙыҡһынды «Художка» арт-студияһы директоры Светлана Ғәбрәүепова. - Креатив индустриялар бөгөн бөтә кимәлдә лә максималь ярҙам ала. Республикала Башлыҡ үҙе был йүнәлеш өсөн яуаплы. Бурыс бар: уны мөмкин тиклем үҫтереү. Кластерҙы булдырыу буйынса ла эш бара, - тип билдәләне Премьер-министр. - Структураһы буйынса бындай кластерҙарҙың параметрҙары федераль кимәлдә билдәләнгән. Хәҙер беҙ ижади кластерҙар төҙөүҙә бизнесҡа ярҙам сараларын әҙерләү стадияһында. Резиденттар өсөн льготалы урынлаштырыу шарттары күҙ уңында тотола. Алдағы ике йылда ошондай структуралар барлыҡҡа килер, тип ышанам, - тип хәбәр итте Башҡортостандың эшҡыуарлыҡ һәм туризм министры Светлана Верещагина. Башҡортостан Хөкүмәтенең беренсе вице-премьеры, иҡтисади үҫеш һәм инвестиция сәйәсәте министры Рөстәм Моратов билдәләүенсә, Федераль проект кураторҙары адресына башҡа төбәктәр менән берлектә бер нисә тапҡыр ошо критерийҙы 300-200 миллион һумға тиклем кәметергә тәҡдим ителде. Әлегә ул элекке кимәлдә ҡала. - Шул уҡ ваҡытта беҙ Башҡортостанда Премьер-министр етәкселегендә хеҙмәт етештереүсәнлеге буйынса үҙ программаһын әҙерләү буйынса башланғыс менән сыҡтыҡ. Беҙҙең бурыс - бөтә иҡтисадты юғары етештереүсәнле рельстарға күсереү, - тине ведомство башлығы. Ҡыҙыҡһынған предприятиены Башҡортостан предприятиелары өсөн һөҙөмтәле идара итеү ҡарарҙары Хакатонында ҡатнашырға саҡырҙылар. Сара 3 декабрҙә Өфөлә Халыҡ-ара бизнес аҙналығы сиктәрендә үтәсәк. «Вита-кардио» яуаплылығы сикләнгән йәмғиәтенең медицина клиникаһы директоры Евгений Мазитов артабан инвалид балаларҙы реабилитациялауға сертификаттар биреләсәкме-юҡмы икәнлеген асыҡланы. - Беҙҙә сертификаттарға ғаризалар йыл һайын 20 авгусҡа тиклем ҡабул ителә, сертификаттар 1 сентябргә тиклем бирелә. Был сроктар Башҡортостан Хөкүмәте ҡарары менән көйләнгән. Киләһе йылдың ғинуарында сертификаттар тапшырыу тергеҙелә. Бының өсөн 150 миллион һум һалынған, был яҡынса 3,5 мең сертификат, - тип яуапланы Башҡортостандың ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников. Анна Ғәрифйәнова, «Уралстройтранс «Торлаҡ-коммуналь хужалыҡ заводы» йәмғиәте директоры, ТОР резиденты, етештереү ҡеүәтен киңәйтеү өсөн предприятиеға кәрәкле ерҙе арзан хаҡҡа һатып алыу мөмкинлеге тураһында белергә теләне. Андрей Назаров билдәләүенсә, «Нефтекама» ТОР-ы - динамик үҫешкән территорияларҙың береһе, унда 30 резидент эшләй. Ул ер участкаһын һатып алыу хаҡы закондар кимәлендә арта, әммә республика үҫештә ярҙам итергә әҙер, тине. Ошонда уҡ Нефтекама эшҡыуарҙары муниципалитетта эшлекле, инвестиция мөхитен баһалау, шулай уҡ эшҡыуарлыҡ эшмәкәрлегенең төп кәртәләре буйынса интерактив һорау алыуҙарҙа ҡатнашты. Килеүселәрҙең яртыһы тиерлек (45,3%) «бик яҡшы» тигән баһа бирҙе. Һорау алыныусыларҙың 39,9 проценты кәртәләрҙең булмауын теркәгән. Эшҡыуарҙарҙың 23,8 проценты кадрҙар тәьминәтендәге етешһеҙлектәрҙе күргән. Респонденттарҙың 19 проценты кредит ресурстарының ауырлығын күрһәткән. Рәсми өлөштән һуң Нефтекама бизнесының уңышлы вәкилдәре Премьер-министр ҡулынан наградалар алды.