Түбәнге Аташ ауылында яңыртылған мәҙәниәт йорто асылды

Дүртөйлө районының Түбәнге Аташ ауылында яңыртылған мәҙәниәт йорто асылды. Мәҙәниәт учреждениеларына ярҙам һәм яңыртыу “Ғаилә” милли проекты (национальный проект “Семья”) маҡсаттарына ярашлы тормошҡа ашырыла, тип хәбәр иттеләр район хакимиәтендә. Белгестәр инеү төркөмөн ремонтлаған. Шулай уҡ учреждениела тәҙрәләр алмаштырыла, музыка ҡоралдары һәм оргтехника һатып алына. “Яңыртылған Мәҙәниәт йорто – ауылдың мәҙәни тормошо өсөн яңы һулыш. Уны бөтә йәштәгеләр өсөн ысын йәлеп итеү үҙәгенә әйләндереү, һәр кем үҙ талантын асып, үҙен ҙур һәм татыу ғаиләнең бер өлөшө итеп тойһон өсөн бар көсөбөҙҙө һалырбыҙ”, — тип билдәләне Дүртөйлө районының мәҙәни-ял үҙәге директоры Илшат Закирйәнов. Әйтергә кәрәк, Мәҙәниәт йорто бинаһында күренекле композитор, Башҡорт АССР-ының атҡаҙанған мәҙәниәт хеҙмәткәре, атҡаҙанған мәҙәниәт эшмәкәре Мөфтәдин Ғиләжев иҫтәлегенә арналған музей урынлашҡан. “Ғаилә” милли проекты ата-әсәләргә һәм балаларға ярҙам итеү өсөн ғәмәлдәге сараларҙы берләштерә: әсәлек капиталы түләнә, икенсе, өсөнсө һәм артабанғы сабыйҙар тыуыу өсөн өҫтәмә стимулдар булдырыла. Бөтә ил буйынса әүҙем оҙон ғүмерлелек практикаһы тормошҡа ашырыла. 14-22 йәшлек йәштәргә музейҙарға, театрҙарға, кинозалдарға һәм башҡа мәҙәниәт учреждениеларына бушлай йөрөргә мөмкинлек биргән “Пушкин картаһы” программаһы ғәмәлдә. Яңыртылған милли проекттар РФ Президенты Владимир Путин ҡарары буйынса 2025 йылдан тормошҡа ашырыла. Фото: "Башҡортостан" ДТРК-һы. Беҙҙең МАХ каналына https://max.ru/gazetabashkortostan ҡушылығыҙ!