#барыбииргэ
Анал байыаннай дьайыы кыттыылаахтарын дьиэ кэргэттэригэр көмө
I Малдьаҕар үлэни өрө тутар, түмсүүлээх эр дьоно, анал байыаннай дьайыыга инники кирбиигэ сылдьар байыастар дьиэ кэргэттэригэр көмөлөһүөҕүҥ диэн нэһилиэк баһылыга Иван Рыгунов ыҥырыытын өйөөннөр, иккис күннэрин гарааска, баанньыкка анаан уокка оттор маһы бэлэмнии сылдьаллар. Кинилэр маннык аахсыйаны үһүс сылын оҥороллор. Бу мас бэлэмнээһинин үлэтэ түмүктэннэҕинэ, аны аҕыйах хонугунан байыастар дьиэ кэргэттэригэр анаан муус ылан биэрэн хааччыйыахтара.
Субуотунньукка икки күн устата 40-ча киһи көхтөөхтүк кытынна. Манна сүрүннээн тырахтарыыстары бэлиэтиэҕи баҕарыллар, ол курдук Павел Голоков, Филипп Жирков, Олег Исаков уонна дьаһалта тырахтарыыһа Семен Иванов тохтоло суох үлэлээтилэр. Үлэни миэстэтигэр баһылык солбуйааччыта Дмитрий Лаврентьев уонна биригэдьиир Иван Анастатов кыайа-хото салайдылар.
Уйбаан УЙГУУРАП, ааптар видеоҕа устуута уонна хаартыскаҕа түһэриитэ.
