Араларҙы тоташтыра күперҙәр

Өфөлә Ағиҙел аша аркалы күперҙе реконструкциялау 2022 йылдың яҙында башланғайны. Транспорт хәрәкәте был күперҙә 12 һыҙат буйынса ойоштороласаҡ. Әле “Уралмостострой” компанияһының 70 белгесе күпер аша үтергә мөмкинлек бирәсәк һуңғы эштәрҙе башҡара, ә тулы реконструкция һәм күперҙең тирә-яғын күркәмләндереү 2026 йылда тамамланасаҡ. - Ағиҙел аша аркалы күпергә, тейешле талаптарға ярашлы, тест һынауы ла үткәрелде, – ти «Уралмостострой»ҙың 30-сы күпер отряды етәксеһе Дмитрий Терёшкин. – Ул динамик статик өлөштәрҙән тора. Ҙур йөк тейәгән транспорттың тәгәрмәстәре тикшереү өсөн күпер буйлап кузовтарына ҡом тейәлгән машиналар үтәсәк. Һынауға Мәскәүҙән килгән “Мосты” ғилми-тикшеренеү институты вәкилдәре етәкселек итә. Күперҙең тейешле урындарында улар күрһәткестәр биреүсе датчиктар ҙа урынлаштырҙы. Быйыл Башҡортостанда бер юлы 20 күпер төҙөлә һәм реконструкциялана. Улар араһында Октябрьский ҡалаһы янындағы Ыҡ йылғаһы аша, Дүртөйлө – Нефтекама трассаһындағы Танып йылғаһы аша, Белорет районындағы Аҙнағол ауылы эргәһендәге Ағиҙел аша һәм Стәрлетамаҡта Ағиҙел аша күперҙе күрһәтергә мөмкин. Стәрлетамаҡ күпере ҙур объект иҫәпләнә – оҙонлоғо 398 һәм киңлеге 13,45 метр. Ул ошо ҡала һәм уның тирәһендәге ҡалалар, райондар, айырыуса был төбәктә урынлашҡан сәнәғәт предприятиелары өсөн стратегик әһәмиәткә эйә, Ағиҙел аша иҫкергән һәм авария хәленә еткән күпергә параллель һалына. Төҙөү-ҡороу эштәре осорона бында ваҡытлыса үтеү өсөн әлеге иҫкеһен файҙаланып торалар (бында тейешле сикләү билдәләре лә ҡуйылған). Эштәр планға ярашлы бара, объектта йөҙҙән ашыу кеше мәшғүл. Күперҙе 2028 йылдың июленә төҙөп бөтөү планлаштырылған. Яңыһы һалынып бөткәс тә иҫке күперҙән файҙаланыу туҡтатыласаҡ. - Татарстан менән сиктә ятҡан Ыҡ йылғаһы аша күпер төҙөлөшө тамамланып килә. Был ҡоролма “Тормош өсөн инфраструктура” милли проектына ярашлы башҡарыла. Ул ош ике төбәк араһындағы бәйләнеш өсөн ҙур әһәмиәткә эйә. Белгестәр күҙаллауынса, күперҙе үҙгәртеп ҡороу тамамланғас та ул урынлашҡан Октябрьский – Урыҫһыу трассаһында юл трафигы тәүлегенә дүрт мең автомобилгә етергә тейеш, – ти Башҡортостандың транспорт һәм юл хужалығы министры Любовь Минакова. Был күперҙәрҙе 2026-2028 йылдарҙа файҙаланыуға тапшырыу планлаштырыла. Бынан тыш, республика биләмәһендәге федераль трассаларҙа дүрт күпер яңыртыла һәм 14 ҡоролмала (шул иҫәптән “Урал” М-5 һәм “Волга” М-7 магитралдәрендә) планлы ремонт бара. Фото: социаль селтәрҙән.