“Бында тапҡан дуҫтар ышаныслы һәм ҡәҙерле...”

Бәләбәй егете Илдарҙың махсус хәрби операцияла хеҙмәт итеүенә теүәл өс йыл. Ул – өлөшләтә мобилизация буйынса юлланған яугирҙәрҙең береһе. Уларҙың расчетының төп бурысы – һауала ҡаршы оборона тотоу. Орудие уҡсыһы булараҡ, Илдарҙың иңенә лә яуаплы бурыстар йөкмәтелгән. Бәләбәй яугире үҙенә “Муравей” тигән позывной алған. Уның тарихын Илдар ҡыҙыҡ итеп һөйләне: – Тыныс тормошта арыу уҡ ваҡыт сервиста эшләнем. Бер мәл ҙур-ҙур баҫҡыстарҙы ташырға ҡуштылар. Йөкмәп алам да тейешле урынға илтеп һалам. Мине ошо эш барышында күргән иптәштәрем “Муравей” тип шаяртты. Ҡырмыҫҡалар ҙа үҙҙәренән оло йөктө әллә ҡайҙарға ташый ала бит. Бына шулай, әлеге ҡушамат миңә йәбеште лә ҡуйҙы. МХО-ға юлланғас та, позывной уйлап торорға кәрәкмәне. Махсус хәрби операция башланғанға тиклем Илдар өс йыл контракт буйынса хәрби хеҙмәттә була. “Өлөшләтә мобилизация иғлан ителгәс, мине лә саҡырырҙар, тип уйланым һәм ниндәйҙер кимәлдә быға әҙер инем. Шуға күрә был яңылыҡты тыныс ҡабул иттем”, – ти “Муравей”. Ул башта Һарытау ҡалаһы янында хәрби әҙерлек үҙәгендә була. Артабан махсус хәрби операция биләмәһенә юлланалар. Бында ла махсус полигонда тәжрибәле тренерҙар ярҙамында байтаҡ күнекмәләр алалар. Илдар бала саҡтан спорт менән дуҫ була, грек-рим көрәше, бокс, еңел атлетика менән шөғөлләнә. Бындай әҙерлек, әлбиттә, хәрби шарттарҙа ла һис шикһеҙ ярҙам итә. Өйөндә яугирҙе ҡатыны, улы һәм ҡыҙы көтә. “Ярты йылға бер ҡыҫҡа ваҡытлы ялға ҡайтып торабыҙ. Һуңғы тапҡыр апрелдә отпускыла булып килдем. Бында нисек кенә хәүефле, ҡайһы берҙә хәл-торош ҡатмарлы булмаһын, өйрәнәһең, күнәһең, ә бына өйҙән, ғаиләнән айырылып китеү шул тиклем ауыр һәм ҡайтып киткән һайын тағы ла ҡыйыныраҡ кеүек. Унан инде, килгәс, тағы шул өйрәнелгән хәрби тормош башлана”, – тип яҡындарын һағышлы ла, йылы ла итеп иҫләп алды яугир. “МХО ир-егетте үҙгәртәме?” – тип һорайым. “Әлбиттә. Мин үҙем дә үҙгәрҙем. Ғаиләңдең, яҡындарыңдың ни тиклем ҡәҙерле булыуын нығыраҡ аңлайһың. Беҙ һәр ваҡыт иң тәүҙә улар тураһында уйлайбыҙ. Балаларыбыҙ ошондай афәтте күрмәһен өсөн һуғышабыҙ”, – тине ул. Хәрби дуҫлыҡ тураһындағы һорауыма былай тип яуапланы: “Дуҫтар ауыр саҡта беленә, тиҙәр бит. Шуның кеүек бындағы иптәштәргә һәр ваҡыт таянырға, ышанырға була. Ваҡыт үтеү менән улар шул тиклем яҡын, ҡәҙерле кешегә әйләнә. Беҙҙең расчеттан “Бурый”, “Француз”, “Полковник” – тап шундай ышаныслы егеттәр. Беҙ бында, контракт буйынса килгәнме ул, өлөшләтә мобилизация буйынса алынғанмы, бер-бербеҙҙе айырмайбыҙ. Татыу ғаилә кеүекбеҙ. Барыбыҙҙы ла бер теләк берләштерә – тиҙерәк еңеү яулап, һуғышты тамамлау һәм беҙҙе көткән яҡындарыбыҙ янына имен-аман әйләнеп ҡайтыу. Ошо изге уй-ниәт йәшәтә, көс бирә”, – ти тәжрибәле яугир. “Муравей”ҙың күкрәген Жуков миҙалы биҙәй. Был наградаға хәрби ҡаҙаныштары өсөн лайыҡ булған. Алда әйткәнемсә, хеҙмәти бурыстары ла яуаплы уның, сөнки был тарафта күктәр бер ҡасан да тыныс түгел, төрлө “ҡоштар” осоп ҡына тора. “Уларҙы бит сәпкә алып, атып төшөрөү ҙә еңел түгел. Ҡайһы берҙәре шул тиклем бәләкәй – тауышын ишетәһең, үҙен күрмәйһең. Бик тиҙ маневр яһарға һәләтлеләр. Шулай ҙа тырышабыҙ. Бындағы иң иҫтә ҡалған мәлдәрҙең береһе тап шул тәүге дронды атып төшөргән көнөмдөр, моғайын”, – ти Бәләбәй яугире. Киләсәккә уй-ниәттәре, хыялдары ла ябай уның – имен-аман тыуған төйәгенә ҡайтып, ғаиләһе менән бәхетле йәшәү, яратып башҡарған эшен дауам итеү. Тап ошо ябай ғына теләк бындағы һәр яугиргә рух ныҡлығы, иртәгәһе көнгә ышаныс һәм өмөт өҫтәй. Изге уй-ниәттәрегеҙ тормошҡа ашһын, яҡындарығыҙҙың доғалары һәм теләктәре һеҙҙе һаҡлап, яҡлап ҡына йөрөтһөн, егеттәр! Авторы - В. УРАЗБАЕВ. Запорожье өлкәһе. Автор фотоһы.