Өфөгә "Геройҙар ваҡыты" конкурсына бөтә Рәсәйҙән килделәр

Бөгөн Башҡортостандың баш ҡалаһында быйылғы Армия мәҙәниәте көндәренә арналған «Геройҙар ваҡыты» конкурсының финалы үтә. Башҡортостандың баш ҡалаһына илебеҙҙең төрлө мөйөштәренән йырсылар йыйылды. Мәҫәлән, технология-педагогия колледжы уҡытыусыһы Роман Самолетов Ханты-Мансинан: - Мин - музыкант, композитор, йырҙар авторы. Конкурсҡа үҙемдең «Үлемһеҙ полк» автор композицияһы менән килдем һәм ярымфиналға үттем. Өфө мине йылы ҡаршы алды, тәүге тапҡыр сәксәк һәм ҡымыҙ тәмләп ҡараным. Конкурс үҙенең киңлеге, тамашасыларҙың күплеге менән таң ҡалдырҙы, кешеләрҙә ул, һис шикһеҙ, ҡыҙыҡһыныу уята. «Үлемһеҙ полк» йырын Роман яҙын, 9 Май алдынан яҙа. Осраҡлы рәүештә был конкурс тураһында белеп ҡала һәм көсөн һынап ҡарарға була. «Үлемһеҙ полк» темаһы Рәсәйҙең һәр кешеһенә яҡын, барыбыҙҙың да олатай-өләсәйҙәре һуғышҡан, уларҙың батырлыҡтарын хәтерҙә һаҡлау мөһим», - тип һыҙыҡ өҫтөнә алды Роман. Лариса Санжиева Бурятияның баш ҡалаһы Улан-Удэнан килгән. Ул - Көнсығыш-Себер дәүләт мәҙәниәт институты доценты һәм РФ Композиторҙар союзының почетлы эшмәкәре, Бүрәт Республикаһының атҡаҙанған сәнғәт эшмәкәре. "Өфөлә беҙ беренсе тапҡыр, бындай конкурста ҡатнашыуыбыҙға бик шатбыҙ. Мин Геннадий Дагуровтың шиғырҙарына «Иван ағайыма» йырын алып килдем, Уны Бүрәт Республикаһының атҡаҙанған артисы Доржо Шагдуров башҡарҙы. Миңә күренекле йырсыларыбыҙ Абдразаҡовтарҙың тыуған илендә булыу бик оҡшай. Сәнғәт институтына барып өлгөрҙөм, Өфө коллегаларымдың эше менән танышыу бик ҡыҙыҡлы булды. Иң сағыу тәьҫораттарҙың береһе – Өфөләге Шаляпин һәйкәле. Һеҙҙең баш ҡалағыҙ матур, иркен урамдар һәм һәйкәлдәр күп", - ти ул. Фото: фестивалдең ойоштороу комитетынан. Сығанаҡ: https://dzen.ru/a/aK72gJml32RFrtd3