“Әлдә көс биреүсе балаларым бар..."

Мәләүез районының Ерек ауылында йәшәгән Гөлназ Оморҙаҡова –- махсус хәрби операция биләмәһендә яҡын кешеһен юғалтҡан йөҙәрләгән ҡатындарҙың береһе, тип яҙа “Көнгәк” гәзите. Ул – Рәйлә һәм Фәтҡулла Оморҙаҡовтарҙың татыу ғаиләһендә тыуып үҫкән өлкән бала. Мәктәпте тамамлағас, механика-технологиялар техникумында, артабан Өфө иҡтисад һәм сервис институтында юғары белем ала. Тормош иптәше Юлай Батталов менән уларҙы баш ҡала осраштыра. Бер аҙ Өфөлә йәшәгәс, йәштәр Мәләүезгә ҡайта. Икеһе лә эшләй, тормоштары башҡаларҙыҡынан бер ни менән дә айырылмай. Илдә сәйәси хәл үҙгәргәс, йортта ла тыныслыҡ юғала. Юлайҙың телевизорҙан махсус хәрби операция тураһындағы тапшырыуҙарҙы ҡарағандан һуң үҙенә бикләнеүен һиҙемләй кәләше. “Егеттәргә ҡыйыныраҡ, ахырыһы”, тигән һүҙҙәренең мәғәнәһен йөрәк аҫтында өсөнсө балаһын йөрөткән Гөлназ тиҙҙән аңлай. Күңеле борсолоу менән тулы ир түҙеп ята буламы? Бер кемгә лә әйтмәй, 2024 йылдың майында контракт төҙөп, ире махсус хәрби операция зонаһына юллана. “Тәүҙә бик бошондом. Шылтыратмай торһа, йөрәгемде хәүеф биләй. Ут эсендә икәнлеген күңелем менән тоям, иртән торһам да, кис ятһам да ”иҫән-һау булһын, Еңеү менән ҡайтһын”, тигән теләкте доға урынына ҡабатлай инем. Дзержинский йүнәлешендә штурмлаусы булды. Май айында һирәк булһа ла һөйләштек. Ундағы хәл менән ҡыҙыҡһыныуҙың урынһыҙ икәнлеген аңлағанлыҡтан, бер ҡасан да һорау бирмәнем. “Яҡшы ашаталар, кейендерҙеләр. Яйлап булһа ла алға барабыҙ”, тиер ине. Бер көн телефондың теге осонда кинәт кенә: ”Улыбыҙ тыуһа, Салауат тип ҡуш, йәме! Батыр, ҡаһарман булһын”, – тип әйтеүе йөрәккә уҡ булып ҡаҙалды. Илап ебәрҙем, “нишләп йөрәгемде өҙәһең, тыуғанын да, үҫкәнен дә күрергә яҙһын”, тим. Ҡыҙғанысҡа ҡаршы, оло һөйөү менән ҡурсалауым оҙаҡҡа барманы. Ошо уҡ йылдың июнендә хәбәрһеҙ юғалды. Көтөп алған улыбыҙҙың тыуыуын да белмәне. Әммә уның васыяты буйынса Салауат тип исем ҡуштыҡ. Ауыр мәлдәрҙә атай-әсәй, ҡәйнәм терәк булды. “Юғалды” тигән хәбәр алғас, һигеҙ ай дауамында “бәлки, иҫәндер” тигән ышаныс менән йәшәнем. Хәүеф, билдәһеҙлек йәшәргә, мәсьәләләрҙе хәл итергә, донъяны һәүетемсә алып барырға ҡамасауламай ҡалманы. Иремде эҙләп яҙған хаттарымдың һанын аныҡ ҡына әйтә алмайым, төрлө инстанцияларға йөрөү ҙә ауырлыҡ менән бирелде. Иремде алып ҡайтып, тыуған яғы Дәүләкән районының Иҫке Көрмәнәй ауылында ерләнек”,- тип хәтер ебен тағата яугир ҡатыны. Бөгөн Гөлназ 13 йәшлек Илдар улы, быйыл 1- се класҡа уҡырға барасаҡ Мәҙинә ҡыҙы һәм һигеҙ айлыҡ Салауат улы менән аҡрынлап күңел төшөнкөлөгөнән сығырға тырыша. Ил именлеге, балаларының бәхетле киләсәге өсөн һәләк булған Юлайының рухы, күҙенә ҡарап торған ҡыҙ һәм улдарының яҡты яҙмышы хаҡына ауырлыҡтарға бирешмәй йәшәргә кәрәклеген яҡшы аңлай әсә. Төшөнкөлөк , хәүеф эсендә йәшәү Гөлназ һымаҡ көслө рухлы ҡатындарға ят сифат. Йәне ҡырҡҡа өҙөлөрҙәй мәлдәрҙә лә балаҡайҙары өсөн атай ҙа, әсәй ҙә булыуы көс өҫтәй уға. Фото: “Көнгәк” гәзите сайты.