Ун көн элек республикала урып-йыйыу кампанияһы башланды. Комбайндар ужым арышын һәм бойҙайын, арпаны һәм борсаҡты йыя. Эштәрҙең тәүге көндәре ҡыуандара – Башҡортостан рекордлы уңыш йыя. Бөгөнгә күрһәткестәр тураһында Хөкүмәттең аҙналыҡ кәңәшмәһендә Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрахманов һөйләне. – Ураҡтың тәүге көндәрендә Башҡортостанда иген һәм ҡуҙаҡлы иген сәселгән майҙандарының 10проценты сабылды һәм 550 мең тоннанан ашыу иген һуғылды. Әлегә эшсәндәр ужым арышын һәм бойҙайын, арпа, борсаҡ йыя. 1,5-2 аҙнанан яҙғы игенде урып йыйыуға тотонасаҡбыҙ, – тине вице-премьер. Иң ҡыуаныслыһы, быйыл уңыш йәнә рекордтар ҡуя. Уртаса уңыш – гектарынан 40,1 центнер. Ә иң юғары күрһәткес — гектарынан 60 центнер, ул Нуриман районында теркәлгән. Быйыл бөтәһе 2,67 миллион гектар майҙандан уңыш йыйып алырға кәрәк (былтырғы кеүек үк). Шуларҙың 1,4 миллион гектары — иген һәм ҡуҙаҡлы иген, 690 меңе— техник культуралар. Төбәктә 34 элеватор һәм келәт уңыш алыуға әҙер, улар 4 миллион тоннаға яҡын иген һәм майлы культуралар һыйҙыра ала. Бынан тыш, 24 августан ике шәкәр заводы эшләй башлаясаҡ. Урып-йыйыу кампанияһында бөтәһе 4,2 мең комбайн ҡатнаша. Вице-премьер техник паркты артабан яңыртыу кәрәклеген билдәләне. Һүҙ тәү сиратта Рәсәй һәм Белоруссия машиналары тураһында бара. 2030 йылға тиклем Башҡортостанға эшкәртелгән майҙанды тәүлегенә 100 мең гектарға еткереү һәм уңыш йыйыу ваҡытын ҡыҫҡартыу өсөн 1,2 мең самаһы комбайн һатып алырға кәрәк. Башҡортостан Башлығы Радий Хәбиров ауыл эшсәндәренә урып-йыйыу кампанияһын уңышлы тамамлауҙарын теләне. Фото: Башҡортосан Башлығы сайты.