Ул бер үк вакытта спорт та, уен да. Күп кенә язучылар шахмат тактасы артында әсәрләренә сюжетлар эзләгәннәр һәм илһам чыганагы буларак кулланганнар. Александр Сергеевич Пушкин беркайчан да партия уйнарга каршы булмаган. Владимир Набоков та бик яхшы шахматчы булган. Шахматны уен дип санасак, хәтер һәм фикерләү мантыйгы күнегүләре, чыдамлык, ихтыяр көче тәрбияләү буенча уеннар арасында аңа тиңнәр юк. Балалар китапханәсендә «Шах һәм Мат» күргәзмәсе үз эшен башлады, анда шахмат тарихы, атаклы шахматчылар һәм бу мавыктыргыч уен кагыйдәләре турында китаплар тәкъдим ителгән. Шулай ук балалар һәм ата-аналар бер-берсе белән шахмат та уйный алалар.