Кемгә терәк булырға кәрәк, шунда ашыҡты...

Тутыя һәм Насибулла Абхалиҡовтарҙың йәшеллеккә сумып ултырған ҙур йорто Абзан ауылының йәмле ситендә генә, эргәһендә гөрләп аҡҡан йылғаһы, уңайлы иркен биләмәһе бар. Хужалар йорттарына төкәтеп, ҙур веранда төҙөй башлағандар. Бик матур, күркәм булмаҡсы. Ғаилә башлығы Насибулла Ғиззәтулла улы беҙҙе йорт биләмәһенә инергә саҡыра, хатта оло йәштәге, теремек Фәнзилә инәй ҙә әйҙүкләп ҡаршыларға килеп сыҡҡан. Татыулыҡта, берҙәмлектә йәшәгән ғаилә һөйөнөс-көйөнөстәрҙе уртаҡлашып, ауылдаштары менән кәңәш ҡороп йәшәргә күнеккән. Ҡунаҡсыл ғаиләнең йорт стеналарындағыфотоларға, шатлыҡлы йөҙҙәргә ҡарап, уларҙың ниндәй бәхетле, бер-береһенә ихлас, иғтибарлы булыуҙарын күрәһең. Улар араһында махсус хәрби операцияла хәрби бурысын үтәгәндә батырҙарса һәләк булған Элмирҙең фотолары айырым урын алып тора. Бала юғалтыу ҡайғыһынан да ҙурырағы, йөрәкте нығыраҡ телгеләгәне юҡтыр, Абхалиҡовтарҙың был әҙәм күтәргеһеҙ юғалтыуҙы кисергәндән һуң да йәшәргә көс табыуы, хәстәрлек һәм һөйөүҙәрен ейәндәре Әлмирға күсереүе, батыр улдарының яҡты иҫтәлеген түкмәй-сәсмәй һаҡларға тырышыуы ихтирамға лайыҡ. Элмир Абзан урта мәктәбен тамамлағас, армия хеҙмәтен Алыҫ Көнсығышта ракета һәм артиллерия ғәскәрҙәрендә үтә. Аҙаҡ Өфөләге 129-сы профессиональ лицейға уҡырға инеп, һөнәр алып сыға. 2012-2021 йылдарҙа “Башнефть” һәм “Роснефть” системаһында скважиналарҙы капиталь ремонтлау хеҙмәтендә эшләй. Ҡатыны Динара Марсель ҡыҙы мәктәптә инглиз теленән балалар уҡыта. Улдары Әлмир мәктәптә уҡый. – Улымдың Өфөлә эшләп йөрөгән сағы ине. 2022 йылда мобилизация башланыу менән хәрби хеҙмәткә алдылар. Бер тапҡыр ҙа зарланырға яратманы, һәр саҡ йөҙө яҡты, ауыҙы йырыҡ булды. Шуға күрә уға ылығып барҙылар, иптәштәре күп булды. Өҫтәүенә йырларға яратты, төрлө конкурстарҙа ҡатнашты, – тип хәтерләй улын әсәһе Тутыя Рәйес ҡыҙы. – Өс тапҡыр ҡыҫҡа ваҡытлы ялға ҡайтып китте. Беҙ уны күмәкләп флагтар тотоп, шарҙар осороп, шатланып ҡаршы алдыҡ. Һуңғыһында ниңәлер күңел шомланды, бер ҙә кире ебәргем килмәгәйне үҙен. 2024 йылдың 18 июль көнөн һис оноторлоҡ түгел. Иртәнге сәғәт дүртенсе яртыла миңә иптәштәре менән төшкән фотоһын ебәргәндәр. Барыһының да йөҙҙәре ябыҡ, тик улымдың бите генә ҡапланмаған. Аҫтында яҙыу: “Пусть земля будет пухом”. Йөрәк жыу итеп китте, мин барыһын да аңланым, тик был хәлде кисерерлек тә, һөйләшерлек тә түгелмен. Аҙаҡ хеҙмәттәштәре ауыр хәбәрҙе еткереп шылтыратты. Ут аҫтынан сығарып, ярҙам итергә өлгөрмәгәндәр. Рәсми рәүештә һәләк булған көнө 29 июль тип иҫәпләнә. Әле лә хеҙмәттәштәре менән бәйләнеш тотабыҙ, килгәндәре лә бар. Атаһы Насибулла Ғиззәтулла улы Элмирҙең яуҙа батыр һуғышсы, ғаиләлә ҡалҡандай һаҡсы, кәйефте күтәреүсе күңелсәк булыуы менән ғорурлыҡ кисерә. “Әле лә беҙ уның ярҙамын, хәстәрен тоябыҙ,бер ҡасан да йөҙгә ҡыҙыллыҡ, ғаиләгә ауырлыҡ килтермәне, – ти атай. – Утыҙ йәшкә тиклем барыһын да булдырҙы: өйләнде, ғаилә ҡорҙо, йорт һалды, барыбыҙ өсөн ҙур терәк булды. Бәләкәй сағынан кеше ҡайғыһына битараф булманы, һәр саҡ ғәҙеллеге, ярҙамсыллығы менән һоҡландырҙы, кемгә терәк булырға кәрәк, шунда ашыҡты. Иптәштәренең һөйләүенсә, ул яу яланында шулай һәр кемгә ярҙам ҡулы һуҙырға тырышҡан, үҙенең хәүефһеҙлеге тураһында уйлап та тормаған, уның башҡаса булдыра алмауын яҡшы беләм”, - ти атаһы. Лайыҡлы ҡыйыу ул үҫтергән Абхалиҡовтар. Элмир Насибулла улы 428-се мотоуҡсылар полкы миҙалы, икенсе дәрәжә “Хәрби батырлыҡ өсөн миҙалы, “Донбассты ҡотҡарған өсөн” 428-се мотоуҡсылар полк ы миҙалы, “Махсус хәрби операцияла ҡатнашыусыға” миҙалы менән наградланған. Махсус хәрби операция башланғас та, уның позицияһы аныҡ, ныҡ булған. –Эйе, улым тәүге көндәрҙә үк фекерен ҡәтғи белдерҙе. “Мин аҡса өсөн һуғышмайым, уны мин эшләп тә таба алам. Тыуған ил, Башҡортостан һәм, әлбиттә, яратҡан Абзаным өсөн һуғышасаҡмын”, тиер ине, – тип әсә улын хәтергә алды. Һуңғы тапҡыр ҡайтҡанында “Град” позывнойлы яугирҙең белдергән һүҙҙәрен ауылдаштары хәтерләйҙер: “Мин үҙемдең егеттәрем эргәһенә ҡайтам. Унда һәр кемде, ниндәй вазифа биләүенә ҡарамаҫтан, төрлө хәүеф һағалай . Әммә һәр кем үҙенең ни өсөн тап ошонда булыуын яҡшы аңлай. Ҡасан һуғыш тамамланып, еңеү беҙгә килер, мин әйләнеп ҡайтырмынмы, юҡмы – уныһы билдәһеҙ,тик мин улымдың тыныс күк йөҙө аҫтындағы Еңеү парадында ғорурлыҡ менән йөрөйәсәген күҙ алдына килтерәм”. Динә Арыҫланова. Архангел районы. Дилбәр Ишморатова фотолары.