Миңзифа Миҙәхәт ҡыҙы менән Мөҙәрис Мисбах улы 1997 йылда ғаилә ҡора. Тормоштарын йәмләп бер-бер артлы өс балалары донъяға килә. 2006 йылда Ласыновтар Иҫәнбәт ауылына ҡайтып төпләнә. Үҙҙәре әйтмешләй, уларҙы йыр– моң ҡауыштыра. Байыш ауылы егете Мөҙәрис Ласынов бәләкәйҙән гармун уйнай. — Атайым да бик оҫта гармунсы, шунан ҡарап бысҡылдатып өйрәндем инде, – тип йылмая гармунсы. — Ауылдашыбыҙ Рамазан Йәнбәковтың йырҙарына ғашиҡ булып үҫте беҙҙең быуын, ул саҡта гармун–баян уйнай белгән егеттәргә ҡыҙҙар яғынан иғтибар һәм хөрмәт ҙур була торғайны. Мөҙәрис Мисбах улына ваҡытында Баймаҡ районының данлыҡлы Йылайыр совхоз–техникумында оҫта бейеүсе Нияз Байегетов етәкләгән “Йәшлек” халыҡ бейеү ансамбленең алыштырғыһыҙ баянсыһы булып эшләргә лә тура килә, артабан Баймаҡ район мәҙәниәт йортонда баянсы була. 2011 йылда Яңауыл районында үткән “Уйна, гармун!” конкурсында 2-се урынды яулай, төрлө конкурстарҙа ҡатнашып, призлы урындар ала. Ҡатынының тыуған ауылы Иҫәнбәткә күсеп ҡайтҡас та “баянсы кейә