2025 йылдың ғинуарынан Башҡортостан урмандарында инспекторҙар янғын хәүефе хәлен контролдә тотоу өсөн 7200-гә яҡын патруллек үткәрҙе. Был “Экологик именлек” милли проектының бурыстарына яуап бирә, тип хәбәр иттеләр Башҡортостандың Урман хужалығы министрлығынан. – Патруллек итеүҙең маҡсаты – ҡағиҙә боҙоуҙы табыу түгел. Урман хужалығы хеҙмәткәрҙәре халыҡ менән һөйләшә, иҫкәртеү саралары үткәрә һәм агитация материалдары тарата. Беҙҙең эштә ҡағиҙәләрҙе ҡабатлау бер ҡасан да артыҡ булмай, сөнки һүҙ бик күҙалланмаған дошман – ут стихияһы тураһында бара, – тип аңлатты Башҡортостан Республикаһының урман хужалығы министры Марат Шәрәфетдинов. Ауыр юл участкаларында авиация ярҙамында контроль алып барыла. Патруль йышлығы янғын хәүефлелеге класына һәм һауа шарттарына бәйле. Бынан тыш, төбәктең бөтә биләмәһе йыһандан күҙәтелә. Ә янғынға хәүефле райондарҙа “Урман һаҡсыһы” дистанцион видеокүҙәтеү камераларынан мәғлүмәттәр алына. “Экологик именлек” милли проекты (национальный проект “Экологическое благополучие”) тирә-яҡ мөхит тураһында хәстәрлек күрә һәм уны кешеләр өсөн уңайлы итә. Эш бер юлы бер нисә йүнәлеш буйынса бара: ҡалдыҡтарҙы сорттарға айырыу һәм эшкәртеү өсөн инфраструктура булдырыу, сүплектәрҙе бөтөрөү һәм һыу ятҡылыҡтарын таҙартыу, урмандарҙы һаҡлау, атмосфераға ташландыҡтарҙы кәметеү, экологик туризмды үҫтереү һәм биологик төрлөлөктө һаҡлау. Яңыртылған милли проекттар Рәсәй Федерацияһы Президенты Владимир Путин ҡарары буйынса 2025 йылдан тормошҡа ашырыла. Рәмилә МУСИНА фотоһы.