Хоһоон тылынан ДОЙДУБУТ МӨССҮӨНЭ Ийэ сир хоруону иҥэрбит буоругар, Тохтоло суох тимир ардаҕар, хаан тохтор. Ирдэһэр суорума суол устун муннугар... Тураллар кэриэстии — Тулаайах оһохтор! Уот-сэрии сүрэҕэр сайыһан барбыттыы, Кыайыыга уолларын алгыстыыр ийэлэр... Уһуктан соһуллар кутталы, курдаттыы Көрөллөр, тэнийэн умайбыт мас дьиэлэр! Быстары билбэппин, Эһиэхэ хатыылаан — Букатын баар буоллун, Эйэлээх күөх халлаан! Эрэй-муҥ долгуна иһиирэр буруоҕа, Иэдээҥҥэ мас буолан оттуллар көлүөнэ. Эрэнэн этэбит : "Өстөөхпүт охтуоҕа!" — Ити баар! Дойдубут билиҥҥи мөссүөнэ... Бороҥ күн адьарай төрүтүн кэрдээри, Төлкөбүт туһугар тиис тиискэ аалыллар! Боотур аан дойдуга уунаары мичээри, Тымырга хаан турар, харахха — Сарыаллар! Быстары билбэппин, Эһиэхэ хатыылаан — Букатын баар буоллун, Эйэлээх күөх халлаан! Гаврил АДАМОВ. @Новости газеты «Хангалас»