Хөрмәтулла Үтәшев: "Паркта милли һыҙаттар булырға тейеш”

12 майҙа Өфөнөң үҙәгендә урынлашҡан В.И. Ленин паркы ябылды, сөнки унда төҙөкләндереү эштәре башланды. 2025 йылға план буйынса ағастарҙы нығытыу, күп йыллыҡ ҡыуаҡтар ултыртыу, коммуникацияларҙы алмаштырыу, юлдарҙы төҙөкләндереү ҡаралған. Парк 2026 йылдың 11 октябренә асылырға тейеш. Яңыраҡ Башҡортостандың Йәмәғәт палатаһы ултырышында республика Башлығы Радий Хәбировтың ҡушыуы буйынса В.И. Ленин исемендәге паркты төҙөкләндереү буйынса йәмәғәт күҙәтеүенең ваҡытлыса эшсе төркөмө составы раҫланды. 13 майҙа был паркты төҙөкләндереү буйынса йәмәғәт күҙәтеүенең ваҡытлыса эшсе төркөмөнөң беренсе ултырышы үтте. Йәмәғәт күҙәтеүселәре паркты ҡараны, башҡарыласаҡ эштәр күләмен баһаланы, объекттың йөкмәткеһе буйынса фекерҙәре менән уртаҡлашты, подрядсы компания вәкиленә һорауҙар бирҙе. Хөрмәтулла ҮТӘШЕВ, М. Ғафури исемендәге Башҡорт дәүләт академия драма театры актеры, Рәсәйҙәң һәм Башҡортостандың халыҡ артисы, Йәмәғәт күҙәтеүенең ваҡытлыса эшсе төркөмө ағзаһы: – Кешеләрҙе парк ҡына борсомай, шулай уҡ транспортты ҡуйыу урындары, уңайлы шарттар тыуҙырыу буйынса күберәк фекер алышыу ҙа булғандыр. Паркта балалар өсөн уйын майҙансығы, бәләкәй сәхнә майҙансығы эшләү хаҡында ла һүҙҙәр булды. Бәлки, шулай дөрөҫтөр ҙә, сөнки беҙгә, хеҙмәткәрҙәргә, актерҙарға, ә беҙҙең театр бинаһында 400-ҙән ашыу кеше эшләй, бөтөнләй транспорт ҡуйыу мөмкинлеге юҡ. Спектакль ҡарарға килгән 500 тамашасы хаҡында әйтеп тораһы ла түгел. Шуның өсөн дә траспортты ҡуйыу бик мөһим мәсьәлә. Бынан өс йыл элек Бөтә донъя башҡорттары ҡоролтайында паркты төҙөкләндереү буйынса ҡаты бәхәстәр булды. Башҡа төбәктәргә барһаҡ, урыҫ мөхите йә иһә шул төбәктә йәшәгән милләттең орнаменттары, бюстар, һәйкәлдәр аша урындағы милләттең үҙбилдәләнешен, уның булмышын сағылдырған урындар бар. Был паркта шуның юҡлығы беҙҙе ныҡ әсендерҙе. Ултырышта: “Паркта милли һыҙаттар булырға тейеш”, – тип үҙемдең фекеремде әйттем. Ишеттеләр һымаҡ. Бынан бер нисә йыл элек парктың Аҡ йорт яғынан башында ҡурайға ғәләмәт ҙур һәйкәл проекты булған. Паркты төҙөкләндереү проектын өс йыл элек ҡарағанда унда ҡурайға һәйкәл юҡ ине. Шуға ла мин был мәсьәләне тағы ла күтәрҙем – был проектта миллилек юҡ. Комиссия ағзаһы Салауат Ҡолбахтин: “Ҡурайға һәйкәл ҡуйыу мәсьәләһе әле өмөтһөҙ түгел, уға кире әйләнеп ҡайтыу мөмкинлеге лә бар”, – тип әйтте. Ыңғай хәл ителер, тип өмөт итәбеҙ. Рәмилә МУСИНА фотоһы.