Башҡортостандың туристик мөмкинлектәрен Ташкентта тикшерҙеләр

Үзбәкстандың баш ҡалаһында “ИННОПРОМ. Үҙәк Азия” халыҡ-ара сәнәғәт күргәҙмәһе үтә, унда әлеге ваҡытта Башҡортостан Республикаһының рәсми делегацияһы, шул иҫәптән төбәк туроператорҙары ла бар. Сара сиктәрендә 28 апрелдә Башҡортостан Республикаһы эшҡыуарлыҡ һәм туризм министры Зөһрә Гордиенко Үзбәкстандың Экология, тирә-яҡ мөхитте һаҡлау һәм климат үҙгәреше министрлығы ҡарамағындағы Туризм буйынса комитет рәйесе урынбаҫары Сардор Ниязов һәм Үзбәкстандың Шәхси туристик ойошмалар ассоциацияһы вәкилдәре менән осрашты. – Халыҡ-ара сәнәғәт күргәҙмәһе “ИННОПРОМ. Үҙәк Азия” – ике республиканың туристик тармағын үҫтереүгә йүнәлтелгән бәйләнештәр булдырыу һәм берлектәге проекттар әҙерләү өсөн мөһим майҙансыҡ. Төбәктәребеҙҙең туристик потенциалын үҫтереүҙә көстәрҙе берләштереп, халыҡтарыбыҙ араһында мәҙәни бәйләнештәрҙе нығытыу ғына түгел, ә туристик бизнесты үҫтереү өсөн яңы мөмкинлектәр ҙә булдырасаҡбыҙ. Был, һис шикһеҙ, Башҡортостанға ла, Үзбәкстанға ла туристар ағымын арттырырға мөмкинлек бирәсәк, – тип билдәләне Башҡортостан Республикаһының эшҡыуарлыҡ һәм туризм министры Зөһрә Гордиенко. Эшлекле осрашыу барышында Башҡортостан менән Үзбәкстандың туристик мөмкинлектәренең презентацияһы үтте, шулай уҡ туризм өлкәһендә хеҙмәттәшлек буйынса пландар ҡаралды, шул иҫәптән шифаханаларға, курорт зоналарына һәм Башҡортостан менән Үзбәкстандың тарихи иҫтәлекле урындарына туристар ағымын арттырыуға йүнәлтелгән яңы туристик тәҡдимдәр әҙерләү ҡаралды. Халыҡ-ара күргәҙмә сиктәрендә ике республиканың да туристик компаниялары B2B тибындағы һөйләшеүҙәр үткәрә, улар үҙ-ара файҙалы хеҙмәттәшлекте үҫтереү өсөн мөһим платформаға әйләнә. Аныҡ пландарҙы тикшереү һәм туристик хеҙмәттәрҙе үҫтереү ике ил халҡы өсөн дә ял итеүҙе уңайлыраҡ итергә мөмкинлек бирәсәк. Шулай уҡ “Иннопром. Үҙәк Азия” халыҡ-ара сәнәғәт күргәҙмәһе майҙансығында Үзбәкстанда Башҡортостандың Эшҡыуарлыҡ һәм туризм министрлығы Һәм Үзбәкстандың Шәхси туристик ойошмалар ассоциацияһы хеҙмәттәшлек тураһында килешеү төҙөнө. Ул Рәсәй Федерацияһы һәм Үзбәкстан Республикаһы биләмәһендә туризм өлкәһендә берҙәм дөйөм ҡулланылыштағы мәғлүмәт мөхитен булдырыу һәм үҫтереү йәһәтенән яҡтарҙың ниәттәрен нығыта. Белешмә: 2025 йылдың 28-30 апрелендә Үзбәкстандың Caex Uzbekistan күргәҙмә үҙәгендә “ИННОПРОМ. Үҙәк Азия” халыҡ-ара сәнәғәт күргәҙмәһе үтә. Юбилей күргәҙмәһендә донъяның 35 иленән, шул иҫәптән Рәсәй, Үзбәкстан, Белоруссия, Ҡаҙағстан, Ҡырғыҙстан, Төркмәнстан, Азербайжан, Ҡытай, Төркиә, Берләшкән Ғәрәп Әмирлектәре һәм Сәғүд Ғәрәбстаны компаниялары вәкилдәре ҡатнаша. Күргәҙмәнең эшлекле программаһы сиктәрендә 21 сара үтәсәк. Фото: pravitelstvorb.ru.