Радий Хәбиров Өфөләге Еңеү паркында Мәңгелек утҡа венок һалды

Төбәк етәксеһе республикабыҙҙың күп милләтле халҡы исеменән Советтар Союзы Геройҙары Александр Матросов менән Миңлеғәле Ғөбәйҙуллиндың үлемһеҙ ҡаһарманлығына арналған һәйкәлгә венок һалды. Унда Мәңгелек ут яна. Сарала ҡатнашыусылар Бөйөк Ватан һуғышы яуҙарында һәләк булған Тыуған ил һаҡсыларын бер минутҡа тын ҡалып иҫкә алды. Яугирҙәрҙең үлемһеҙ ҡаһарманлығына арналған тантаналы маршта Өфө фән һәм технологиялар университеты, Рәсәй Эске эштәр министрлығының Өфө юридик институты курсанттары, ике тапҡыр Советтар Союзы Геройы Муса Гәрәев исемендәге башланғыс осоу әҙерлеге Өфө дөйөм белем биреү мәктәп-интернаты тәрбиәләнеүселәре ҡатнашты. Төбәк етәксеһе ике тапҡыр Советтар Союзы Гепройы Муса Гәрәев ҡәберенә, Рәсәй Геройы генерал-майор Миңлеғәле Шайморатов һәм генерал-майор Таһир Күсимов бюстарына, “Десантсылар быуындары союзы” һәйкәленә сәскә һалды. Паркта булғанда Радий Хәбиров Бөйөк Ватан һуғышы ветерандары, тыл хеҙмәтсәндәре менән аралашты, уларҙы байрам менән ҡотланы, һаулыҡ, оҙон ғүмер теләне. Бөйөк Ватан һуғышы ветераны Нина Климович, уға бер ай ярымдан 100 йәш тула, республика Башлығына эшендә уңыштар теләне һәм өлкән быуын вәкилдәренә иғтибар, махсус хәрби операцияла ҡатнашыусылар, уларҙың ғаилә ағзалары тураһында хәстәрлек өсөн рәхмәт белдерҙе. Республика етәксеһе ветеранды юбилейы менән ҡотларға киләсәге тураһында әйтте. Башҡортостан Башлығы тематик байрам майҙансыҡтарында булды. Бында 193-сө балалар баҡсаһы тәрбиәләнеүселәре концерт номерҙары менән сығшы яһаны, шулай уҡ “Хәтер яулығы” сараһы, тематик һүрәттәр күргәҙмәһе булды. Тантана аҙағында Радий Хәбиров Ғәзи Заһитов һәйкәленә сәскәләр һалды. Был һәйкәл былтыр Еңеү көнөндә асылғайны. Журналистар менән әңгәмәлә Радий Хәбиров Еңеү көнөнөң мәғәнәһе тураһында һөйләне. - Бөйөк Еңеүҙең 80 йыллығы – айырыуса оло байрам. Олатайҙарыбыҙҙың ниндәй батырлыҡ күрһәткәнен аңлайбыҙ, - тине Радий Хәбиров. - Әлбиттә, был байрамды лайыҡлы билдәләргә кәрәк. Өҫтәүенә ул заманса ысынбарлыҡта сағыла – махсус хәрби операция бара. Шуға күрә был көндө махсус хәрби операцияла ҡатнашыусыларға хөрмәт һүҙҙәрен әйтәбеҙ, уларҙың туғандарына, яҡындарына айырыуса иғтибар күрһәтеп һәләк булғандарҙы хәтергә алабыҙ. Һәр муниципалитетта Еңеү көнөн байрам иткәндә мотлаҡ һәләк булған яугирҙәр ғаиләләре буласаҡ. Ә алғы һыҙыҡтағы егеттәргә сәләмәтлек һәм уңыштар теләйем. Сығанаҡ, фото: Башҡортостан Республикаһы Башлығы сайты.