Գյումրու նախկին քաղաքապետ Սամվել Բալասանյանին ձերբակալելու որոշում է կայացվել

Գյումրու նախկին քաղաքապետ Սամվել Բալասանյանին ձերբակալելու որոշում է կայացվել, հայտնում է Հանրային հեռուստաընկերությունը։

Հեռուստաալիքի տեղեկություններով՝ Բալասանյանի նկատմամբ հանրային քրեական հետապնդում է հարուցվել Սև Բերդ պատմամշակութային ամրոցի հարակից հողերը հանցավոր ճանապարհով օտարելու համար։

Գործով մեղադրյալ է նաև նախկին քաղաքապետի կրտսեր որդին՝ Խաչատուր Բալասանյանը։

Հոկտեմբերի 11-ին Armlur.am-ը հայտնել էր, որ «Զվարթնոց» օդանավակայանից իրավապահները բերման են ենթարկել նախկին քաղաքապետի որդուն և տարել Հակակոռուպցիոն կոմիտե։ Հակակոռուպցիոն կոմիտեի մամուլի ծառայությունն Armenia Today-ին հայտնել էր, որ իրենց մոտ նման դատական գործ առկա չէ։

Բալասանյանը Գյումրի համայնքի ղեկավարի պաշտոնն զբաղեցրել է 2012-2021 թվականներին: 2021 թվականի նոյեմբերին քաղաքապետ էր դարձել Վարդգես Սամսոնյանը, ում թեկնածությունը պաշտպանել են «Բալասանյան դաշինք» և «Քաղաքացիական պայմանագիր» խմբակցությունները:

Նորություններին հետևեք մեր կայքում, ինչպես նաև Telegram-ում և YouTube-ում