Яҡтар уртаҡ эшкә әҙер

Бөгөн “Торатау” конгресс-холында Башҡортостан Башлығы Радий Хәбиров Донецк Халыҡ Республикаһы Башлығы Денис Пушилин менән осрашты. ДХР-ҙың рәсми делегацияһы кисә Республика көнөнә арналған сараларҙа ҡатнашыр өсөн килгәйне. Осрашыуҙа төбәк-ара хеҙмәттәшлек йүнәлештәрен тикшерҙеләр. Башҡортостан Башлығы мөнәсәбәттәрҙе артабан да нығытыу мөмкинлектәре ҙур тине, шул иҫәптән иҡтисади яҡтан да. – Беҙ Донецк Халыҡ Республикаһының нисек үҫешеүен иғтибар менән күҙәтәбеҙ. Яңыраҡ эш сәфәре менән Донбасста булғайным, унда төбәктең етди тергеҙелеүен күрҙем. Был беҙҙең иҡтисади интеграция өсөн мөһим әһәмиәткә эйә. Шул уҡ ваҡытта беҙ Рәсәйҙең яңы төбәктәренә бөтә кәрәкле ярҙамды күрһәтеүҙе дауам итәбеҙ. Бөгөн Башҡортостан кешеләренең ҙур ғына өлөшө махсус хәрби операцияла Донбассты һаҡлай. Беҙ шулай уҡ ауыл-ҡалаларҙы тергеҙеүҙә һәм урындағы халыҡҡа гуманитар ылау ташыуҙа әүҙем ҡатнашабыҙ. Ошо йүнәлештәр менән бер рәттән Башҡортостан, әлбиттә, уртаҡ мәҙәни һәм спорт проекттарын тормошҡа ашырырға әҙер,– тине Радий Хәбиров. Донецк Халыҡ Республикаһы Башлығы Денис Пушилин Башҡортостан халҡына төбәккә ярҙам иткәндәре өсөн рәхмәт әйтте һәм етеп килгән дәүләт байрамы менән ҡотланы. – Республика көнөн байрам иткәндә Өфөлә булыу беҙҙең өсөн ҙур абруй. Беҙҙең туғандарса мөнәсәбәттәрҙең тамыры тәрән. Һәм, әлбиттә, Башҡортостандың ярҙамын юғары баһалайбыҙ. Улар алғы һыҙыҡта һуғыша, халыҡҡа медицина ярҙамы күрһәтә, юлдарҙы һәм социаль объекттарҙы тергеҙә, – тине Денис Пушилин. – Радий Фәрит улы, һеҙгә Донбассты нығытыуға индергән шәхси тырышлығығыҙ өсөн айырым рәхмәт. Махсус хәрби операция бурыстарын үтәгәндән һуң, беҙ төбәктәребеҙ халыҡтары мәнфәғәте өсөн тырышып эшләрбеҙ тип ышанам. Журналистар менән аралашып, Радий Хәбиров менән Денис Пушилин ике төбәкте берләштереүсе төп факторҙар һәм уртаҡ эш йүнәлештәре тураһында һөйләне. – Элек беҙҙең олатайҙар иңгә-иңгә терәшеп дөйөм Тыуған илебеҙҙе фашистарҙан һаҡлаған. Тап шул тарихи ваҡиғаларҙан алып беҙҙең хеҙмәттәшлек башланған. Һәм бөгөн йәнә Башҡортостан егеттәре Донецк Халыҡ Республикаһы, тотош илебеҙ мәнфәғәттәрен яҡлай, – тине Денис Пушилин. – Алда башҡараһы эштәр күп. Был турала Радий Фәрит улы менән фекер алышабыҙ, иң ҡыҙыҡлы башланғыстарҙы уртаҡ эш планына индерербеҙ. Башҡортостан Башлығы предприятиелар һәм бизнес араһында иҡтисади бәйләнештәр булдырыу мөһим тине. – Беҙ Башҡортостан менән Донецк Халыҡ Республикаһы араһында планға ярашлы хеҙмәттәшлекте нығытабыҙ. Эйе, әле уның биләмәһендә махсус хәрби операция бара. Ләкин беҙ Денис Владимирович менән килештек, сәнәғәткә һәм иҡтисадҡа тәрәнәйеү өсөн беренсе мөмкинлек булыу менән был йәһәттән эш башлаясаҡбыҙ, – тине Радий Фәрит улы. Фото: Башҡортостан Башлығы сайты.