Армияла бәләгә тарып, ике аяғын юғалтҡан Рөстәм Нәбиев үҙ миҫалы менән күптәрҙе илһамландыра. Ул - бәхетле ғаилә башлығы, ҡатыны менән ике ҡыҙ тәрбиәләйҙәр, йәмәғәт эштәрендә әүҙем ҡатнаша. Рөстәм Нәбиев үҙенең тыуған ауылын төҙөкләндереүҙә ярҙам итә, Саҡмағош районы күләмендәге төрлө сараларға бағыусы ла. Мәҫәлән, үҙ аҡсаһына Рапат ауылы мәҙәнит йорто эргәһендәге тренажер залына ремонт яһаткан һәм спорт инвентары һатып алған. “Атайсал” һәм “Уңайлы мөхит” проекттары Нәбиев өсөн буш һүҙҙәр генә түгел. Башҡа эш менән мәшғүл булһа ла, ул үҙе кеүек инвалидтар өсөн уңайлылыҡ тыуҙырыу мәсьәләһенә ҙур иғтибар бирә. Тағы ла ул госпиталдәрҙәге яралылар менән осраша, хәленән килгәнсә уларға ярҙам итә. "Мин МХО-ла үҙебеҙҙең егеттәр янында күп тапҡыр булдым. Донецкиға машинаны шәхсән үҙем алып барҙым. Шулай уҡ хәрби госпиталдәрҙә булып, яралылар менән аралаштым. Ҡыҙғанысҡа ҡаршы, хәрби хеҙмәткәрҙәр өйҙәренә төрлө йәрәхәттәр менән ҡайта. Уларҙы онотмаҫҡа, ғәҙәти тормошҡа ҡайтырға ярҙам итергә кәрәк. Иң мөһиме - быларҙың барыһы ла матур һүҙ булып ҡалмаһын, ә ысын эштәр менән нығытылһын. Үҙем, инвалид коляскаһында йөрөүсе кеше буларак, әлеге мәсьәләләрҙе хәл итеүҙә ниндәйҙер ярҙам күрһәтеүгә шат буласаҡмын. Кем белә, бәлки, Өфө илдә мөмкинлектәре сикле кешеләр өсөн уңайлы тәүге ҡала булыр?!" - ти Рөстәм. Рөстәм Нәбиев ижтимағи эшмәкәрлеге өсөн Президент Владимир Путин Указына ярашлы Дуҫлыҡ орденына лайыҡ булды. “Изгелегең үҙеңә әйләнеп ҡайтыр, тип юҡҡа ғына әйтмәйҙәр. Мин фажиғәгә тарығас, башҡаларҙың ярҙамын ныҡ тойҙом, быны онотоу мөмкин түгел. Миңә дауаланырға аҡса йыйҙылар, шул иҫәптән күп яҡташтарым да. Бик рәхмәтлемен һәм изгелеккә изгелек менән яуап бирергә тырышам. Был мине илһамландыра. Үҙең дә һаулыҡ мөмкинлеге сикле булыуға ҡарамаҫтан, кешеләргә ярҙам итеү, ярҙам итергә мөмкинлегең булыу – ул бик шәп”, - ти “Бәхет – бергәләп” проекты геройы. "Минеңсә, ярҙам итеү, изгелек ҡылыу кешенең ҡанында, ул тыуғанда уҡ һалына. Үҙемде белә-белгәндән һәр ваҡыт кешеләргә ярҙам итергә тырыштым. Бының өсөн, әлбиттә, гел генә финанс мөмкинлектәре булманы, тик ул ваҡытта ла эшем менән ярҙам итергә тырыштым. Һәр ваҡыт изге күңелле булдым һәм шул сифатты һаҡлайым. Ваҡыт үтеү менән был сифат киңәйә генә бара», — ти блогер. Изгелек рәхмәтле булыу хисенән ярала. Рәхмәтле кеше генә бәхетле була ала, ти Рөстәм Нәбиев. Проект Башҡортостан Башлығы Гранттар фонды саралары иҫәбенә тормошҡа ашырыла.