Йәш саҡтарында, уҙған быуаттың 70-се йылдарында, минең атайым һәм әсәйем Өфө районының Нөрлө ауылындағы нефть ҡыуҙырыу станцияһында эшләгән. Тәүге мәлдә улар Шәһиҙә (Шәйҙә тип йөрөтәләр) исемле инәйҙә фатирҙа йәшәгән, артабан уларға эштән торлаҡ - вагончик биргәндәр. Мин шунда тыуырға тейеш булғанмын. Әммә әсәйем декрет отпускыһына сығып, ауылға ҡайтҡан мәлдә донъяға килгәнмен. Силсәүиткә Эльвира тип исем ататырға китеп барған әсәйемдең ҡаршыһына тап булған почтальон биргән атайымдан килгән хатта "ҡыҙым тыуһа, Гөлдәр тип исем ҡушығыҙ" тип яҙылған була. Тиҙҙән атайым да ҡайтҡан һәм бергәләп ҡабаттан уларҙың эш урынына киткәнбеҙ. Мин Нөрлө ауылында Шәһиҙә өләсәйҙең балалары, ейәндәре ҡулында йөрөп үҫкәнмен. Ул саҡта төшкән фотоларҙа был асыҡ күренә. Миңә бер-ике йәштәр булғанда ғаиләбеҙ ауылға күсеп ҡайта. Шунан 20 йылдай ваҡыт үткәс кенә Нөрлөгә юл төштө. Күмәкләп, тотош автобус яллап барҙыҡ, бер нисә көн Кәбировтарҙа булдыҡ, Шәһиҙә өләсәйҙе күрҙек. Унан һуң мин студент саҡта ла уларға барып йөрөнөм. Шул Шәһиҙә өләсәй бөгөн республикала иң өлкән кешелер, моғайын. Әле Шәһиҙә (Шәйҙә) Нурияздан ҡыҙы Кәбироваға 107 йәш. Ул 1917 йылдың 2 майында тыуған. Бер йәше лә тулмаҫтан ата-әсәһе вафат булған сабыйҙы инәһе тәрбиәләп үҫтерә. Һуғыш алдынан ул Хисаметдин Кәбировҡа кейәүгә сыға. Ләкин тиҙҙән ире фронтҡа китә. Шәһиҙә ҡәйнәһе һәм балалары менән донъя көтә. Хисаметдин һуғыш тамамланып, ике йыл уҙғас ҡына ҡайта. Ғаиләлә тағы балалар тыуа. Әммә ир яраларынан мандый алмай, алты йылдан вафат була. Шәһиҙә Нурияздан ҡыҙы колхозда ла эшләй, алты баланы бер үҙе аяҡҡа ла баҫтыра. Бөгөн 107 йәшлек өләсәй ейәне Альберттың ғаиләһендә йәшәй. Алты балаһының икәүһе иҫән, ә бына ейән-ейәнсәрҙәре, бүлә-бүләсәрҙәре күп. Хәлен белергә килеп торалар. Өләсәйҙәре уларҙың барыһын да танып ултыра, бәләкәстәрҙе таҡмаҡ әйтеп бейетеп тә ала: - Емдәр һиптем, Ашағыҙ, ҡошҡайҙарым, Мәңге рәхәт эсендә Йәшәгеҙ, балаларым. Әлеге фотола ул ейәненең ейәнсәрҙәре менән. Тимәк, зат-ырыуҙың бишенсе быуынының үҫкәнен күрә Шәһиҙә Кәбирова. Фото һәм видео: ғаиләнең шәхси архивынан.