“Мин хаҡ юлдан барам!”

“Уҡытыусы – ниндәй гүзәл исем!” конкурсында ҡатнашҡан алдынғы ҡарашлы, эшһөйәр, шәп педагогтар менән таныштыра башлайбыҙ. Бөгөнгө һүҙебеҙ – Краснокама районы Яңы Аҡтанышбаш ауылының Х.Н. Нурғәлиев исемендәге урта мәктәбе уҡытыусыһы Инзилә Салауат ҡыҙы Аҡбарова хаҡында. Ҡыҫҡаса белешмә: Тыуған көнө:​ 24 май​ 1984​ йыл. Тыуған урыны: Башҡортостан​ Республикаһы​ Краснокама районы​ Яңы​ Аҡтанышбаш​ ауылы. Белеме: ​ 2008 йылда М.​ Аҡмулла исемендәге Башҡорт​ дәүләт педагогия университетын ​ тамамлаған. Педагогик ​ стажы: 20 йыл. Инзилә Салауат ҡыҙы – юғары категориялы, тәжрибәле уҡытыусы. БР Мәғариф һәм фән министрлығының​ Рәхмәт​ хаты, Бөтә донъя башҡорттары ҡоролтайы башҡарма комитетының Рәхмәт хаты менән бүләкләнгән. Ул даими рәүештә үҙен үҫтереү өҫтөндә эшләй. “Остаз” республика конкурсының зона этабында улар​ команда менән 3-сө урынды яулаған, 2023 йылда дәрестән тыш саралар әҙерләү буйынса “Рус түгел, ​ ләкин россиянмын”республика конкурсында еңеүсе булып танылған. Шулай уҡ И.С. Аҡбарова – республика әҙәби-ижади «Халыҡ шағиры» конкурсында Башҡортостандың халыҡ шағиры Назар Нәжмиҙең ижади мираҫын өйрәнеп, “Иң яҡшы методик эшләнмә " номинацияһында 3-сө урынға лайыҡ булған. Быйыл Ғ. Соҡорой премияһы лауреаты Кәүсәриә Шафиҡованың ижадына арналған «Шафиҡ уҡыуҙары» республика ғилми-ғәмәли конференцияһында ​ еңеүсе булған. Ауыл биләмәһе территорияһын үҫтереүгә ҙур өлөш индергәне һәм өлгәшкән уңыштары өсөн Шушнур ауыл советы ауыл биләмәһе хакимиәтенең рәхмәт хаттары менән бүләкләнгән. Инзилә Салауат ҡыҙы 2021 йылда Төбәк-ара «Башҡорт теле һәм әҙәбиәте йыл уҡытыусыһы» конкурсында ла үҙен һынап ҡараған, ҡатнаыусы Дипломы менән билдәләнгән. “Уҡытыусы һөнәренә нисек килдегеҙ, йәғни ни өсөн тап ошо һөнәрҙе һайланығыҙ?” – тигән һорауҙы ла бирҙек Инзилә Салауат ҡыҙына. – Уҡытыусы һөнәрен һайлау – үҙеңә ҡарата талапсанлыҡ, тырышлыҡ билдәһе. Һис шикһеҙ, хаҡ юлдан барам. Хеҙмәт стажым – 20 йыл. Янымда – яратҡан уҡыусыларым, ​ хөрмәтле хеҙмәттәштәрем. Зауығыма ярашлы һөнәр һайлауым менән бәхетлемен! Бала килеш кенә күңелемдә: «Уҡытыусы булам!» тигән уй яралғанда, талпыныу менән был хыялыма ашҡынғанда, уҡытыусы һөнәренең ҙур яуаплылыҡ һәм оло сабырлыҡ талап иткәнен аңлап та етмәй инем әле. Күҙ алдыма бары һәр көн ашҡынып мәктәпкә барыуым, унда киләсәккә өмөт менән бағыусы бала күҙҙәре ҡаршылауы ине. Уҡытыусылыҡ һөнәренә ҡарата ихтирам миндә сабый саҡтан уҡ тәрбиәләнде. Бында туғандарымдың, уҡытыусыларымдың роле һанап бөткөһөҙ булды. Мәҫәлән,​ Наиса​ апайым күп кенә балаларҙа башҡорт теле​ фәненә ҡарата һөйөү тәрбиәләне. Әлеге көндә лә уҡыусылары уны ғәҙел, талапсан булғаны өсөн​ һәр саҡ ололап иҫкә ала. Сажиҙә​ апайым – тәжрибәле, белемле, күбеһенә өлгө, маяҡ булып торған уҡытыусыларҙың береһе. Илфаҡ ​ ​ ағайым Яңы​ Аҡтанышбаш​ ауылы мәктәбен етәкләй. Үҙ эшен ысын күңелдән яратҡан, маҡсатына ирешеүсән, тәүәккәл уҡытыусы ул. Ошондай мөхиттә үҫкәнгә, күңелемдә: «Уҡытыусы булам!» тигән уй бик иртә яралды. Әсәйем менән атайым эшкә киткәс, апайым менән икәүләп «уҡытыусы» булып уйнағаныбыҙ, яңы ғына алып ҡайтылған шкаф ишеген​ класс​ таҡтаһы урынына ҡулланыуыбыҙ – әле лә хәтеремдә… – тип һөйләне Инзилә Аҡбарова, был изге һөнәрҙе һайлау нескәлектәре тураһында. Эйе, уҡытыусы булыу һәр кемгә лә бирелмәйҙер ул. Бала ғүмерең иң саф, иң наҙлы, ғәмһеҙ сағы – бала саҡтың матур, мәктәп йылдарының ҡыҙыҡлы хәтирәләр менән үтеүе лә уҡытыусы менән бәйле. Инзилә Салауат ҡыҙы ла уҡытыусы һөнәрен һайлауына үкенмәй, сөнки яратҡан эше уға ҡанат ҡуя, дәрт, көс өҫтәй. “Мәктәпкә килеп ингәс, һине йылмайып көтөп алған йөҙҙәрҙе күреү – ​ үҙе бик ҙур бәхет минең өсөн. Үҙ һөнәреңде яратып, хеҙмәтеңә күрә хөрмәтен ​ тойоп йәшәүҙән дә ҙур бәхет бармы икән?!” – ти ул. ​ Яңы​ Аҡтанышбаш​ урта мәктәбендә эшләүен дә бәхет тип һанай, сөнки үҙе лә нәҡ ошо мәктәптә белем алған. Уҡытыусы – ауыр, яуаплы, әммә иң изге һәм мәрхәмәтле һөнәрҙәрҙең береһе. Яғымлы, изге күңелле, балалар менән уртаҡ тел таба белгәндәр генә ошо һөнәрҙе һайлайҙыр. Инзилә Салауат ҡыҙы ла уҡытыусы булыуы менән сикһеҙ ғорурлана. Уҡыусылары ла уңыштары менән ҡыуандырып тора тырыш уҡытыусыны. Араларында «Урал батыр»ҙы ятҡа белеүселәр ҙә күп. “Төрлө сараларҙа, конкурстарҙа,​ олимпиадаларҙа​ урындар алыуҙары, ижади һәләттәре, телмәрҙәре үҫеүе, бер-береһенә ихтирамлыраҡ була башлауҙары – мине сикһеҙ бәхетле итә”, - ти Инзилә Салауат ҡыҙы. Эшен, уҡыусыларын яратҡан, улар менән көн дә аралашыуҙан ​ йәм тапҡан педагогҡа туған мәктәбендә, татыу эшһөйәр коллективта артабан да шулай ​ уңышлы эшләргә яҙһын! Фотолар: И. Аҡбарованың шәхси альбомынан. ​