Өфөлә “Башҡорт ихаталары” республика программаһын ғәмәлгә ашырыу бара, уны төбәк Башлығы Радий Хәбиров башлап ебәрҙе, "торлаҡ-коммуналь хужалыҡ өлкәһендә иң яҡшы проект" тип атаны. Быйыл баш ҡалала бөтәһе 10 ихата тулыһынса яңы төҫ аласаҡ, улар 33 күп фатирлы йортто берләштерә. Мәҫәлән, Өфөнөң Ленин районында Шмидт урамы, 16, 16/1 һәм Әхмәтов урамы, 316, 316/4 адрестары буйынса йорт яны биләмәләре төҙөкләндерелә. Быйыл Өфөнөң 450 йыллығына арналған брендлы элементтар балалар майҙансыҡтарын биҙәүҙә сағыу һыҙаттарҙың береһе булды. Бөгөнгө көндә Шмидт урамы, 16, 16/1 адресы буйынса ихата биләмәһендә балалар уйын майҙансығында бәләкәй архитектура формалары ҡуйылған: тау, уйын йорто һәм автомобиль рәүешендәге балалар сәңгелдәге. Биләмә тигеҙләнгән, хәүефһеҙлекте тәьмин иткән япма һалырға ҡала. Шулай уҡ сағыу биҙәү эштәре тамамлана. Әхмәтов урамы, 316, 316/4 адресы буйынса урынлашҡан ихаталар биләмәләрендә иҫке бордюр таштарын һүтеп алып, яңыларын ҡуйыуға тотонғандар. Гөлсибәр ИСМӘҒИЛЕВА, пенсионер: – Мин бында 50 йылға яҡын бирле йәшәйем. Минең хәтерҙә бындай үҙгәреш бер ҡасан да булманы. Ейәнем бәләкәй саҡта беҙгә башҡа ихаталарҙа яҡшы балалар майҙансыҡтары эҙләргә тура килде. Ҡайһы берҙә хатта “Аграр университет” туҡталышындағы майҙансыҡҡа ла йөрөнөләр. Хәҙер иһә балаларға үҙ йорттары янында ваҡыт үткәреү ҡыҙыҡлы, ә сағыу һүрәттәр менән биҙәлгән әйберҙәр күҙҙең яуын алып ултыра. Айырыуса көҙ һәм ҡыш, тирә-яҡта һоро буяуҙар ғына булған саҡта. Башҡортостанда “Башҡорт ихаталары” йорт яны биләмәләрен комплекслы төҙөкләндереү программаһы 2019 йылдан тормошҡа ашырыла. Был ваҡыт эсендә бөтәһе 1326 ихата төҙөкләндерелгән, унда 400 мең кеше йәшәй. Программаны тормошҡа ашырыуға сарыф ителгән аҡсаның күбеһе республика бюджетынан бүленә. Был илдә Башҡортостанда ғына ғәмәлдә булған үҙенсәлекле программа. Ул граждандарҙың күп фатирлы йорттарҙа йәшәү шарттарын яҡшыртыуға йүнәлтелгән һәм уларға үҙҙәре теләгәнсә йыһазландырырға мөмкинлек бирә. Фото: house.bashkortostan.ru