Белеүебеҙсә, “Атайсал” проекты тураһында тәҡдимде Башҡортостан Башлығы Радий Хәбиров 2019 йылдың ноябрендә тыуған төйәгенә – Ишембай районының Һайран ауылына эш сәфәре барышында белдергәйне. Артабан инде ойоштороу комитеты, проекттың положениеһы, махсус сайт булдырылып, эш башланды. Шул мәлдән бөгөнгәсә ошо проектҡа йөҙәрләгән, меңәрләгән кеше ҡушылды. Улай ғына ла түгел, бөгөн “Атайсал” проекты менән илдең башҡа төбәктәре лә ҡыҙыҡһына, үҙҙәрендә тормошҡа ашырыу теләген белдерә. Бөгөн “Атайсал” – республиканың барлыҡ төбәктәрендә киң ҡолас алған проект. Изге йөрәкле, ярҙамсыл, йәнтөйәген яратҡан кешеләр социаль әһәмиәтле объекттар төҙөүгә, булғандарын ремонтлауға, мәктәптәргә, балалар баҡсаларына, мәҙәниәт йорттарына, ауыл китапханаларына ярҙам итеүгә ғәйәт ҙур иғтибар бүлә. Хәйбулла районы Таштуғай ауылында тыуып-үҫкән Рәсәйҙең һәм Башҡортостандың халыҡ артисы, Салауат Юлаев исемендәге дәүләт премияһы лауреаты Хөрмәтулла Үтәшев "Атайсал" проектына тәүгеләрҙән булып ҡушылып, ауылдаштарына шәп бүләк яһаған. Был хаҡта Хәйбулла районы башҡорттары ҡоролтайы хәбәр итә. "Түңгәүерҙәрҙең ҡор башы, билдәле яҡташыбыҙ Хөрмәтулла Ғаззали улы Үтәшев Хәйбулла районында ошо көндәрҙә үткән алтынсы ырыу йыйыны барышында "Атайсал" проекты сиктәрендә ауылдаштарына шәп бүләк эшләне - ут һүндереү прицебы бүләк итте. Билдәле булыуынса, бынан бер нисә йыл элек ошо уҡ проект сиктәрендә Хөрмәтулла Ғаззали улы тыуған ауылында шишмәне төҙөкләндергәйне. Шулай уҡ уның ярҙамында ауылға ингән ерҙә Түңгәүер ырыуының стелаһы барлыҡҡа килде. Ниндәй генә юғары ҡаҙаныштарға өлгәшһә лә тыуған ауылы Таштуғайҙы, ауылдаштарын онотмаған яҡташыбыҙға афарин тиергә генә ҡала!" - тип яҙа ҡоролтай төркөмөндә. Әйткәндәй, проекттың даирәһе йылдан-йыл киңәйә бара. Башланғыста илебеҙҙең 20-нән ашыу төбәгендә йәшәгән меценаттар ҡатнаша, улар араһында Яҡут Республикаһы, Ханты-Манси автономиялы округы, Мәскәү, Санкт-Петербург, Сочи ҡалаларында йәшәгән яҡташтарыбыҙ бар. Улай ғына ла түгел, бөгөн беҙҙең “Атайсал” проекты менән илдең башҡа төбәктәре лә ҡыҙыҡһына, үҙҙәрендә тормошҡа ашырыу теләген белдерә. Проектҡа ярашлы, көҙҙән яҙғаса республика төбәктәрендә “Атайсал – кесе Ватан” зона форумдары үтә. Улар барышында башланғыста ҡатнашыусылар үҙ-ара фекер алыша, тәжрибә уртаҡлаша, изге эштәре менән башҡаларға өлгө күрһәткән яҡташтар тәбрикләнә. Артабан республика кимәлендә ҙур форум ойошторола. Фото: Хәйбулла районы башҡорттары ҡоролтайы төркөмөнән