"Бурсервис" нисек йәшәй?

Өфөнөң «Бурсервис» компаниялар төркөмө 2026 йылға хеҙмәткәрҙәр һанын ике тапҡырға арттырырға ниәтләй. Предприятиела нефть һәм газ скважиналарын быраулау һәм ремонтлау өсөн инструменттар сығарыу ҡеүәтен дә арттырырға планлаштыралар. Был хаҡта Башҡортостан Башлығы Радий Хәбиров уҙғарған оператив кәңәшмәлә «Бурсервис» ғилми-производство предприятиеһының генераль директоры Марат Дауытов хәбәр итте. Производствола барлығы 1 000 квалификациялы белгес эшләй, улар инновациялы продукцияның меңдән ашыу төрөн сығара. Бының өсөн предприятие үҙенең ҡорамалдар эшләү үҙәген булдырған. 2024 йылдың беренсе ярты йыллығында компаниялар төркөмө коллективы уҙған йылдың ошо уҡ осорона ҡарағанда 35 процентҡа күберәк продукция сығарған. Ҡорамалдарҙы Рәсәй төбәктәренә һәм донъяның һигеҙ иленә – Беларусь, Ҡаҙағстан, Үзбәкстан, Әзербайжан, Мысыр, Берләшкән Ғәрәп Әмирлектәре, Иран һәм Ливияға – экспортлайҙар. Предприятиеның генераль директоры Марат Дауытов производствоны үҫтереү өсөн республика ярҙамының әһәмиәтен билдәләне. Мәҫәлән, «Бурсервис» Башҡортостан сәнәғәтен үҫтереү фондынан льготалы займ менән файҙаланған, шулай уҡ төбәк лизинг компанияһының отошло шарттарҙа технологик ҡорамалдар һатып алыу программаларында ҡатнаша. 2022 йылдан «Бурсервис» компаниялар төркөмө шулай уҡ «Хеҙмәт етештереүсәнлеге» милли проектында ҡатнашыусылар иҫәбенә инә, уның сиктәрендә предприятие үҙ продукцияһын әҙерләүгә сығымдарҙы һәм ваҡытты кәметеүгә өлгәшкән. Марат Дауытов хәбәр итеүенсә, «Бурсервис» халыҡ-ара кимәлдәге программалар буйынса артабан уҡытыу өсөн яңы хеҙмәткәрҙәр ҡабул итеү менән ҡыҙыҡһына. Башҡортостан Башлығы предприятие коллективына эштәрендә уңыштар теләне һәм республиканың белгестәр йәлеп итеү өсөн кадрҙар эшен ойоштороуҙа ярҙам итергә әҙер булыуын билдәләне. – Һеҙ хеҙмәткәрҙәр һанын ике тапҡырға арттырырға ниәтләйһегеҙ, был еңел эш түгел, – тине төбәк етәксеһе Радий Хәбиров. – Беҙ һеҙгә был тармаҡтағы колледждарыбыҙ менән тығыҙыраҡ эшләргә ярҙам итергә әҙербеҙ. Фото: Башҡортостан Башлығы сайты.